Giron Sámi Teáhter ovttasbargá Ruoŧa Riikkateáhteriin «Ædnan» teahterbihtás, muhto korona geažil fertejit heaittihit buot čájálmasaid.
«Ædnan» teahterbihtás lea golmma buolvva nissoniid birra 1900-logus ja gieđahallá gažaldagaid nu go gullevašvuođa, giela ja identitehta. Ja movt bággojohtimat mat čađahuvvojedje čuohtejagi dassái leat váikkuhan sogaide buolvvas bulvii.
Muhto korona dilli dagaha ahte Giron Sámi Teáhter dál dieđiha ahte šluhttejit buot čájálmasaid mat ledje plánejuvvon dán jahkái:
– Dađi bahábut mii leat ferten giddet «Ædnan» johttičájálmasaid, ja dahkat buot mii lea min vuoimmis ahte čájálmas boahtá fas johtui boahtte jagi, čállá Giron Sámi Teáhter iežaset neahttasiidui.
Teáhterhoavda Åsa Simma cealká ruovttusiiddus ahte sii sávvet fas oažžut johtui «Ædnan» turneamátkki boahtte jahkái.
