Norggas leat badjel 2,5 miljovnna dosa boahkuhuvvon, ja fargga lea okta goalmmát oassi álbmogis ožžon vuosttaš dosa.
1.631.293 olbmo leat ožžon vuosttaš dosa, ja mii lahkonit ovtta goalmmát oasi olles álbmogis. 967.110 olbmo leat ožžon nuppi dosa.
– Lean hui duhtavaš go olbmot váldet boahku, vai mii jođáneappo boahtit dábálaš árgabeaivái, dadjá stádaministtar Erna Solberg.
Stádaministtar muittuha liikká ahte pandemiija ii leat vel nohkan ja ahte sáhttá ain leavvat báikkálaččat.
– Lea dehálaš muittuhit buohkaid doallat mehtera gaskka ja čuovvut njoammuneastadan njuolggadusaid, vaikko doaibmabijut leat geahpiduvvon, dadjá son. (©NTB)
