– Bealálašvuohta ja stuora boasttuvuođat leat dahkkon Kárášjoga Utøya-ruđaid dárkkistanbarggus, lohká Dutkanlávdegotti miellahttu raportta birra mii čájeha ahte 2 miljovnna eai geavahan nuoraide.
– Bealálašvuohta ja stuora boasttuvuođat leat dahkkon Kárášjoga Utøya-ruđaid dárkkistanbarggus, lohká Dutkanlávdegotti miellahttu raportta birra mii čájeha ahte 2 miljovnna eai geavahan nuoraide.
Guovtteoaivilvuohta joatká Utøya-ruđaid dárkkistanraportta maŋŋel. Dárkkistanlávdegoddi lea dán jagi gávnnahan ahte 2,55 miljovnnas lea dušše 400 000 ruvnno boahtán nuoraide buorrin.
Dárkkistanlávdegotti miellahttu Thoralf Henriksen lohká:
– Stuora boasttuvuođat leat dahkkon dárkkistanbarggus, go okta gii jođihii dan barggu, lea ieš bealálaš ii ge leat dieđihan dan Dárkkistanlávdegoddái, muitala Henriksen ABC Nyheter siidui.
Henriksen ávžžuha dál Kárášjoga gieldda hilgut dárkkistanraportta gielddastivrras dán duorastaga.
Bagadalai revisora
– Lean ožžon duođaštuvvot ahte okta Dárkkistanlávdegotti miellahttu gii galggai jođihit barggu, Tore-Jan Gjerpe, lea bagadallan revisora gii galggai dárkkistit gieldda bargiid, dadjá Henriksen.
– Aŋkke eai leat jearahallan dearvvašvuođa- ja sosiálahoavdda, rektora dahje organisašuvdnajođiheaddji geat vuostáiválde nuoraid go ráđđeolmmái lei luomus, dadjá Henriksen ja lasiha ahte son ii sáhte dohkkehit ahte hovdejeddjiide ii addo ovddasvástádus.
Buvttiiba evttohusaid
Tore-Jan Gjerpe, gean Dárkkistanlávdegoddi lei bidjan bargat dárkkistemiin ovttas Ingvald Laitiin, lea vuollánan Henriksena moaitámušaide.
– Revišuvdnabarggus ráhkadeimme moai Ingvald Laitiin evttohusaid movt čađahit guorahallama ja jearahallanfáttáid maid revisorii buvttiime, muitala Gjerpe ABC Nyheterii.
Riidu gielddain
Thoralf Henriksen lohká Gjerpe bealálažžan.
– Dan maid lávdegoddi dalle ii diehtán lea ahte Tore-Jan Gjerpes lea riidu gielddain, go čuoččuha ahte son govssahalai ja vealahuvvui go lei ohcan gielddas virggi masa ii virgáduvvon, muitala Henriksen.
Ođđajagemánus lea diggi gieldda vuostá, ja Gjerpe lea gáibidan 500 000 ruvdnosaš buhtadusa gielddas.
– Gjerpe lea dán dihte bealálaš čađahit guorahallama gielddas, go Dárkkistanlávdegoddi ii lean ožžon dieđuid áššis. Jus livččen diehtán váidaga birra, de livččen evttohan Gjerpe geassádit Dárkkistanlávdegottis, lohká son.
– Dárkkistanlávdegoddi gal lea diibmá juo diehtán mu ášši birra gieldda vuostá, ja dan sáhttá jođiheaddji duođaštit, dadjá Tore-Jan Gjerpe.
Iežaska virgádan
Henriksen lea maid reageren go Laiti ja Gjerpe gáibideaba 100 000 ruvnno bálkán dárkkisteami ovddas.
– Eaba lean soai geat galggaiga bargat dán barggu go Dárkkistanlávdegotti mearrádus lei ahte lea revisora ja psykologa geat galgaba bargat dán barggu, lohká Henriksen.
– Laiti ja Gjerpe leaba njuolgut virgádan iežaska, vaikko gielddastivra ja Dárkkistanlávdegoddi ii leat addán válddi dahkat dan, lasiha Henriksen.
Gieldda ráđđeolmmái ii áiggo máksit bálkká sudnuide ovdal go gielddastivra lea mearrádusa dahkan. Gielddastivra juolludii 400 000 ruvnno dárkkistanbargui, ja ráđđeolbmás ii leat váldi máksit daid ruđaid, muitala Henriksen.
Gjerpe fas lohká Henriksen buktá boasttu dieđuid.
– Mearrádusas čuožžu ahte Laiti ja Gjerpe galgaba bargat ja jođihit barggu, ja lei ovttajienalaš mearrádus Dárkkistanlávdegottis ahte moai galggaime bargat dán barggu.
