Vaikko Kárášjoga gielddastivra hilggui ráđđealbmá Elfrid Boine evttohusa biehttalit máksit bálkká rapporttas mainna Ingvald Laiti ja Tore-Jan Gjerpe barggaiga, de lea son lihkká duhtavaš go leat lávken viidáset «Utøya» áššiin.
Vaikko Kárášjoga gielddastivra hilggui ráđđealbmá Elfrid Boine evttohusa biehttalit máksit bálkká rapporttas mainna Ingvald Laiti ja Tore-Jan Gjerpe barggaiga, de lea son lihkká duhtavaš go leat lávken viidáset «Utøya» áššiin.
Bargiidbellodat, Sámeálbmot Bellodat, Olgeš ja Johttisámiid listtu bukte liigecealkámuša ja dan olis giddejedje čoahkkima ja bivde maiddái Ingvald Laiti oasálastit giddejuvvon čoahkkimii, ovdal go válde jienasteami.
Loga maid: – Bealálaččat gáibidit mávssu «Utøya-raportta» ovddas
Čuovvula mearrádusa
Ráđđealmmái Elfrid Boine lohká fertet čuovvulit gielddastivrra mearrádusa.
– Dat maid gielddastivra lea mearridan dál, ferten mun vuhtiiváldit. Dat maid Ingvald Laiti čuoččuha boasttu dieđuid oktavuođas, in leat mun dadjan ahte sudnos ii lean váldi ráhkadit rapporta. Dat maid mun čuoččuhan, lea ahte eai gávdno makkárge šiehtadusat ahte soai galgaba oažžut mávssu barggu ovddas. Dát lea juoga maid mun hálddahusa bealis ferten čuoččuhit, muhto dál go gielddastivra lea dahkan mearrádusa, de čuovvulan mun dan, dadjá ráđđealmmái.
Ožžo ieža mearridit
Ođđa evttohusas ákkastuvvui earet eará ahte dárkkistanlávdegottis alddis lei váldi mearridit mo geavahit ruđaid.
– Gielddastivrra mearrádusa vuođul, de galggai leat dárkkistanlávdegotti iežas duohken vuoruhit ruđaid nu mo ieža dáhttot barggu oktavuođas. Dása lei várrejuvvon 400 000 ruvnnu. Čujuhuvvo maiddái ahte dárkkistanlávdegoddái addui olles váldi mearridit friddja gean bálkáhit ráhkadit guorahallama, celko evttohusas.
Stoarpmaid siste
Ráđđealmmái ii dieđe ahte mannágo bálkámáksin ášši Stuorradiggái, muhto ieš «Utøya» rapporta galgá guorahállot sin dárkkistanlávdegottis.
– Bálkámáksinášši ii gula ieš rapportii, muhto in leat áibbas sihkkar, inge duosta diesa vástidit, dadjá son.
«Utøya» ášši lea guhká jo jorran medias ja ráđđealmmái lea leamaš máŋgii garra stoarpmaid siste. Muhto dál leat mearrádusaid dáhkan ja jotket bargguin mainna leat jo álgán, namalassii láhččit dili dán 12 nuorra gillájeaddjái.
Ávvir jearrá ahte dovdágo ráđđealmmái ášši leamaš noađđin sutnje.
– In sáhtte ovdanbuktit iežan dovdduid stoarpma oktavuođas, muhto oainnán ahte ášši leamaš stuorra noađđin Kárášjoga gildii. Ja lea hui buorre go gielddastivra dál lea dahkan dan mearrádusa. Mii leat beassan ovtta lávkki viidáset, sáhttit čielgasit mannat viidáset ja geahččat ovddasguvlui, loahpaha son.
