-Almmuhus-
OĐĐASATOaivvilda ain láhkarihkkumiid

Oaivvilda ain láhkarihkkumiid

-

-

Kárášjot’lista gielddastivrraáirras Sissel Gaup lei áidna gii jienastii dárkkistanlávdegotti ovddeš jođiheaddji Ingvald Laiti ja miellahttu Tore-Jan Gjerpe bálkká máksima vuostá ja doarjjui ráđđealbmá evttohusa

Sissel Gaup dadjá guorrasit ráđđealbmá evttohussii, dan sivas go lei vuđolaččat čilgen ášši beliid.

– Man vuođul gielda máksá bálkká, go doppe eai gávdno makkárge duođaštusat šiehtadusain. Ii gielddastivrras, iige dárkkistanlávdegottis, nugo mun lean lohkan lávdegotti mearrádusas, mii dahkkui njukčamánus. Dallehan sii mearridedje váldit olggobeale olbmuid guorahallat ja dasa lei maiddái ráđđealmmái čujuhan, dadjá son.

 

Oaivvilda láhkarihkkuma

Gaup lea duhtameahttun gielddastivrra mearrádusain ja oaivvilda ahte guorahallan barggus leat dahkkon láhkarihkkumat, maid son ii goittot okto nagot duođaštit.

– Leat maiddái juristtat ja maiddái dárkkistanlávdegotti čállingoddi, geat oaivvildit ahte bálká ii berrešii máksojuvvot, go eai gávdno čielga mearrádusat mat lea dahkkon, dadjá son.

 

Ášši manná viidáset

Vaikko Sissel Gaup lohká dál guođđit ášši, de ii loga dan goittot nohkat dasa.

– Dát áššihan gal manná dál Stuorradikki dárkkistanlávdegoddái ja vuođđuduslávdegoddái, geat galget gávnnahit makkár boasttuvuođaid mii leat dahkan. Sii leat dáhtton oažžut ášši ja ministtar lea ieš lohkan ahte sii vurdet dassážii go Kárášjoga gielda lea gieđahallan dán ášši ja de son geahččá dan, dadjá son.

 

-Almmuhus-