-Almmuhus-
OĐĐASATOažžu bálkká, muhto cuiggoda ráđđealbmá vuogi

Oažžu bálkká, muhto cuiggoda ráđđealbmá vuogi

Journalista

-

-

Odne meannudii Kárášjoga gielddastivra dárkkistanlávdegotti «Utøya-raportta» mas lea boahtán ovdán ahte gielda ii leat geavahan riekta «Utøya-milliuvnnaid». Ovdal go rapporta gieđahallui, de jienastii gielddastivrra bálkká birra mii guoská guorahallamii.

Kárášjoga gieldda dárkkistanlávdegotti ovddeš miellahttu guovttos Ingvald Laiti ja Tore-Jan Gjerpe leaba dan barggu ovddas sádden 101 525 ruvdnosaš rehkega gildii.

Ráđđeolmmái Elfrid Boine lei ge sádden liige mearkkašumi gielddastivrii dán áššis, mas ávžžuha ahte gielda ii mávsse sudnuide dan maid leaba gáibidan. Dán biehttalii gielddastivra ja dohkkehii mávssu Laitii ja Gjerpeii.

 

Bukte sierra evttohusa

Máksin biehttaleami ákkastii ráđđealmmái dainna ahte ii leat goasse mearriduvvon sudnuide čađahit dan guorahallama.

Bargiidbellodat, Sámeálbmot Bellodat, Olgeš ja Johttisámiid listtu bukte liigecealkámuša ja dan olis giddejedje čoahkkima ja bivde maiddái Ingvald Laiti oasálastit giddejuvvon čoahkkimii, ovdal go válde jienasteami.

Guovddášbellodaga áirras Anne Toril E. Balto cuiggodiige gielddastivrra, go moadde beaivvi ovdal čoahkkima ožžot dieđu vejolašvuođas buktit cealkámuša.

 

Duhtavaš

Gieldda dárkkistanlávdegotti ovddeš jođiheaddji Ingvald Laiti lea duhtavaš ahte ášši lea lohppii gieđahallon bálkká ektui.

– Dát ii leamaš noađđin gal munnje, muhto mu mielas lea unohas mo ráđđealmmái lea ovdanbuktán ášši gielddastivrii boasttu dieđuid vuođul, dadjá son.

 

Cuiggoda fasttes áššin

Ingvald Laiti mielas lea njulgestaga fasttes vuohki ráđđealbmás ovddidit ášši.

– Vuosttaš lea dat ahte ráđđealmmái oaivvilda ahte munnos Gjerpiin ii lean váldi rahkadit rapportta. Ráđđealmmái lei ieš dan čoahkkimis, gos mii gieđahalaimet dan ášši ja doppe boahtá ovdan ahte rapporta galgá ráhkaduvvot dárkkistanlávdegottis, gos moai čohkkáime. Dan seammá gažaldaga lea maiddái ráđđealmmái sádden iežas advokáhtii ja doppe lea maiddái váldán eret dan čuoggá. Mu mielas orro viehka fasttes ášši ráđđealbmás, oaivvilda son.

 

Váldá eret fokusa

Laiti cuiggoda «Utøya» áššis eanemus bálkká máksima, gos ráđđealmmái buktá nu ollu boasttu dieđuid gielddastivrii ja oaidná stuorámus meaddimin sudno Gjerpen bealálašvuođa ja bálkká mávssu.

– Jus moai livččiime leamaš bealálaččat, de lei dat mielddisbuktit ahte jus gielddastivra lei čuovvolit ráđđealbmá evttohusa, de lei olles rapporta gahččat čoahkkái ja lei šaddat fas ođđasit álgit, dadjá son.

Seammás oaivvilda dán ášši váldit eret fokusa dan deháleamos áššis ja dat lea láhččit Kárášjoga nuoraide, geat vásihedje «Utøya» terrorismma suoidnemánu 22.beaivvi 2011:s.

Gielddastivra dohkkehii maiddái dárkkistanlávdegotti raportta Utøya-ruđaid birra.

Ráđđeolmmái Elfrid Boine ii leat vel astan kommenteret áššái. Ávvir čuovvola ášši.

 

 

-Almmuhus-