Korona geažil fertii son jurddašišgoahtit mo ođasmahttit iežas Colour Your Past doaimma. Dál lea Per Ivar Somby ásahan ođđa neahttabáikki gos fidne dološ ivdnejuvvon sámi portreahtaid.
Per Ivar Somby lea eret Álttás, muhto orru dál Romssa gávpogis, ja su iežas ruovttus leage son vuovdán dološ sámi portreahtaid maid son lea ivdnen. SOME kanálaid bokte lea Colour Your Past olahan fuomášumi ja kundariid, muhto korona geažil son fertii jurddašišgoahtit mo son sáhttá ođasmahttit iežas gávppi. Dál áŋgiruššá son olahit miehtá máilmmi iežas ivdnejuvvon sámi portreahtaiguin.
– Leige koronapandemiija mii dagahii mu jurddašit ođđasit, lohká Per Ivar.
Fáhkka jaskat
– Maŋŋá go lean vuovdán govaid olbmuide geat jerret oastit daid njuolggut mus, de lea fáhkka šaddan hui jaskat maŋŋá go buohkat leat šaddan leat ruovttus giđa rájes. Dat lea veaháš ártet, go govaid han sáhttá vuovdit vaikke olmmošlaš oktavuohta ii leat dárbbašlaš, dadjá son preassadieđáhusas.
Fuobmái čovdosa
Somby dieđiha ahte manai áigi ovdal go son dohkkehii ahte neahttagávpi lea čoavddus go leat váttes áiggit. Dál son lea ge ásahan ođđa neahttagávppi mii lea dál doaimmas. Skábmamánus čađahii kampánja mas čájehuvvui ahte lea stuorra beroštupmi neahttagávpái mas leat dološ ivdnejuvvon govat olbmuin, gávpogiin ja eanadagas mat leat 100 jagi boarrásat.
– Dan áiggis go mii gullat ahte smávva fitnodagat rahčet, de jurddašan mun dat sáhttá leat vejolašvuohta ásahit ođđa ealáhusa dahje gávdnat eará jurdaga mo vuovdalit iežat buktaga, vai birget dan vearrámus koronaroasus, dadjá Per Ivar.
