Davvi-Ruoŧa njoammu korona eanet go goassege ovdal. Bearjadaga gávdne 150 ođđa njoammuma ovtta jándoris.
Dat lea alimus lohku dássážii.
– Dat leat váivves ságat. Sullii 250 olbmui lea njommon guovtti jándoris ja jáhkkimis dat lassána vel. Jáhkkimis lohku duppalasto go árvvoštallá mannan vahku loguid, čilge Norrbottena regiovnna njoammuneastadandoavttir Anders Nystedt preassadieđáhusas.
Norrbotten sáhttá maid oažžut báikkálaš njuolggadusaid nu go eará báikkiin ja regiovnnain Lulli-Ruoŧas leat.
– Mánnodaga mun válddán oktavuođa Ruoŧa álbmotdearvvašvuođa eiseválddiin ja mii áigut ságastit dan dilálašvuođa birra, lohká Nystedt.
Nystedt čilge ahte lea áigi vuoruhit eallima ja dearvvašvuođa ja son lea moaitán go olbmot čoahkkanit ja deaivvadit eanet go ovdal.
Norrbottena leana medisiinnalaš narkosadoavttir Ulf Carlsson atná dili duođalažžan.
– Mun lean hui surolaš dál ja mus lea seamma dovdu go njukčamánus. Sii, geaidda dávda lea njommon, soitet dárbbašit divššu buohcceviesus fargga. Unnán olbmot dihtet makkár intensiivadikšu lea ja mot dat čuohcá olbmui. Dál lea áigi jurddašit sin bearraša, soga ja lagasolbmuid birra, dadjá Norrbottena leana medisiinnalaš narkosadoavttir Ulf Carlsson preassadieđáhusas.
Ovcci olbmo leat divššus Norrbottena leanas ja golmmas leat dál intensiivadivššus.
