Nea Radio álggaha lullisámegiel sáddagiid čakčamánu loahpas.
Nea Radio álggaha lullisámegiel sáddagiid čakčamánu loahpas.
– Nu lea dasto “máilmmi vuosttaš lullisámi lagasradio” šaddame duohtan. Dát lea Nea Radio ja Aajege lullisámi giella- ja kulturguovddáža ovttasbargu, čállet sii preassadieđáhusas.
Maiddái nehttii
Ovttasbargoguimmežagain lea mihttu ásahit lullisámi mediafálaldaga Plassje guvlui, sihke radios ja neahtas. Nu áiggošedje sii nannet lullisámegiela ja maid gaskkustit lullisámegiela kultuvrra ja servodateallima eambbosiidda.
– Áigut vuosttažettiin bargat sámegielagiidda, muhto maiddái earáide geat beroštit lullisámegielas ja kultuvrras, dadjá Aajege beaivválaš jođiheaddji Toini Bergstrøm.
Diibmobeali vahkkus
Aino Linnea Danielssen lea virgáduvvon 30% journalista ja prošeaktajođiheaddji ja sus dat galgá leat váldoovddasvástádus diibmobeallásaš sáddagii juohke vahkku. Sátta gullo olles Nea Radio konsešuvdnaguovllus ja gávdno maid neahtas. Sii oidnet maid dehálažžan oažžut ođđasiid nehttii.
– Mii leat ilus go prošeakta dál duohtandahkko. Nea Radio lea geahččalan álggahit fásta sámegiel sáddagiid ovdal, ja dál mii viimmat lihkostuvvat. Norgga bivnnuheamos lagasradios lea čielgasit servodatovddasvástádussan maid gokčat lullisámi álbmoga dán guovllus, ja mii illudit čakčii, dadjá redaktevra Andreas Reitan preassadieđáhusas.
