1348 Olbmo leat dál áibbas barggu haga Finnmárkkus. Dat leat 16 unnit go njukčamánus diibmá, mii lea 3,4 proseantta bargoveagas.
1348 Olbmo leat dál áibbas barggu haga Finnmárkkus. Dat leat 16 unnit go njukčamánus diibmá, mii lea 3,4 proseantta bargoveagas.
– Eanaš suohkaniin Fylkkas njiedjá bargguhisvuohta. Bargomárkan lea oalle buorre, ja leat unnánit olbmot geat biddjojuvvot virgelohpái. Seammás oaidnit smávva lassáneami olbmuin geat leat bargoálggahandoaimmain NAV bokte, lohká seniorráđđeaddi Eva- Lill J. Margit NAV Finnmárkkus.
Barggut dearvvašvuođa- ja fuolahussuorggis
Dál leat 464 virggi almmuhuvvon olles fylkkas. Eanemus leat Álttás (117), nubbin eanemus Mátta-Várjjagis ( 97) ja Porsáŋggus (66). Suorgi masa lea eanemus dárbu bargiide lea dearvvašvuođa- ja fuolahussuorgi.
Njiedjan diimmá ektui
Njukčamánus lea Gáŋgaviika suohkan gos lea alimus bargguhisvuohta, 6,8 proseanta. Nubbin eanemus bargguhisvuohta lea Guovdageainnus, 5,9 proseanttain. Liikká lea goappeš suohkaniin bargguhisvuohta njiedjan diimmá ektui.
Unnimus bargguhisvuohta lea Unjárgga gielddas, doppe leat 1,8 proseanta bargoveagas barggu haga.
Bargguhisvuohta stáđis
Mátta-Várjjat gielda vásihii jahkemolsun áiggi stuora lassáneami bargguhisvuođas «Sydvaranger Gruve» reastaluvvamiin. 305 olbmo leat dál barggu haga gielddas, mii lea 82 proseantta lassáneapmi diimmá ektui.
– Muhto jus buohtastahttet mannán mánuin, de eai rievdda logut Mátta-Várjjagis. Bargguhisvuohta orro stáđis juste dál, ja dat lea illudahtti, lohká Margit.
