Sara Ellen Anne Eira lea ođđasis válljejuvvon Sámi girkoráđi jođiheaddjin. Čuovvovaš guokte jagi áigu son earenoamážit bargat mánáid ja nuoraid oskuoahpahusain.
– Lea stuora bargu ja ovddasguvlui áiggun bargat viidáseappot sámi girkoeallima strategiijaplánain mii mearriduvvui 2019:s. Mus lea hui bargomiella ja mihten searvat jođiheaddjeválgii ođđasis go vásihan ahte Girkoráđđi lea stuora doarjjan sámi girkoeallimii. Mii fertet nannet mánáid ja nuoraid oskuoahpahusa rámmaeavttuid. Sii dat leat boahtteáigi ja mii fertet sihkkarastit dán oahpahussii buriid eavttuid, lohká Eira Kirkens Pressekontor (KPK) preassadieđáhusas.
Dárbu ođđa oahppoávdnasiidda
Dán oktavuođas oaivvilda Eira lea ge vuoruhuvvon bargun dárkkistit ahte sámi mánát ja nuorat ožžot ođđa oahppoávdnasiid ja dan oskuoahpahusfálaldaga maid dárbbašit ja ánssášit.
Son deattuha maid ahte lea dehálaš sihkkarastit rekrutterema girkolaš virggiide sámi giellaguovlluin. Son namuha maid ahte sámiid gaskkas lea girkoeallin nanus:
– Olu sámi váhnemat gásttašit mánáideaset girkus, eanas nuorat válljejit konfirmeret girkus ja olu bárat náitalit girkus, lohká Eira KPK preassadieđáhusas. Son oaivvilda dili leat ná sihke davvisámi, julevsámi ja lullisámi guovlluin.
