-Almmuhus-
OĐĐASATÁigot viiddidit fanas­johtolaga Elkem ruvkii

Áigot viiddidit fanas­johtolaga Elkem ruvkii

-

-

Fanasjohtingeaidnu Elkem ruvkii Juovlavutnii galgá čiekŋuduvvot ja viiddiduvvot. Muhto  dasa leat vuosttaldeamit ja dán vahku lágiduvvo rabas čoahkkin dan olis.

Ruvkefitnodagas Elkemas lea sávaldat geavahit stuorát fatnasiid fievrridit kvartsihta eret ruvkkes  Juovlavuonas Deanus. Dan olis lea Riddodoaimmahat čielggadeamen prošeavtta. Fanasjohtolat Elkem ruvkii lea coagis, erenomážit gaskal Suoidnesullo ja Lávvonjárgga. Dál ii sáhte ruvkefitnodat geavahit nu stuorra fatnasiid ja fertejit geavahit smávit fatnasiid geasehit kvartsihta. Sávaldat lea maŋŋá čiekŋudeami geavahit stuorát ja eanet birasseasti fatnasiid mat sáhttet fievrridit eanet kvartsihta. Ođđa ja eanet birasseasti fatnasat leat govddibut go fatnasat maid Elkem dál geavaha, ja mannet veaháš čiekŋalabbot. Riddodoaimmahat oaivvilda ahte fanasjohtolat ferte govddiduvvot ja maiddái merkejuvvot buorebut. 

Plánat gárvásat Deanunjálmmi luonddureserváhtas

Leat boahtán dan olis 16 raportta iešguđetge fágabiirres. Guovlu lea Deanunjálmmi luonddureserváhta siskkobealde ja gávcci jagi áigi lea Riddodoaimmahat gárvvistan plánaid mat leat dál sáddejuvvon almmolaš geahčadeapmái. Gulaskuddanáigemearri lea borgemánu 14. b. 2020. Plána mielde galgá váldot eret 360 000 kubihkka sáddo 150 000 kvadráhtamehteris. Dan oktavuođas galgá lágiduvvot rabas čoahkkin Juovlavuona servodatvisttis geassemánu 18. beaivvi. 

Roggamis vátnu nálli 

Dan oktavuođas lea Riddodoaimmahat sádden fanasjohtingeainnu detálljaroggama prošeavtta gulaskuddamii ja 10 iešguđet ásahusa ja searvvi bukte cealkámuša. Okta dain lea Deanučázádaga guolástanhálddahus, mii vuosttalda plánaid. Deanučázádaga guolástanhálddahusa stivrra nubbijođiheaddji Benn Larsen lohká ahte sidjiide lea dohkketmeahttun roggagoahtit fanasjohtingeainnu Deanunjálmmis. 

– Guovlu gos áigot roggat lea oassi olles Deanučázádaga ekovuogádagas ja das eat hálit mii makkárge sisabahkkema. Deanunjálmmis lea stuorra sivlanálli mii lea dehálaš nálli predáhtoraide mat válljejit borrat sivlla ovdalis go luossaveajehiid go mannet merrii, dadjá Larsen, gii balaha sivlanáli vátnut roggama geažil ja dan oktavuođas maiddái čázádaga luossa áitojuvvo.

Imašta 

Larsen oaivvilda ahte leat ártet go čoahkkin dušše lágiduvvo Juovlavuona servodatvisttis go dát ášši guoská nu olu olbmuide olles Deanučázádagas.

–  Riddodoaimmahat orru jáhkkimin ahte dat lea juoidá báikkálaš doaibma mii dušše váikkuha Deanu gieldda. Naba dat eará gielddat, Kárášjohka, Ohcejohka ja maiddái Guovdageaidnu. Doppe leat olbmot geain leat dadjamušat ja buohkat galget gullot, dadjá son.

Ii leat vuostemiella lágidit

Finnmárkku ja Romssa Riddodoaimmahaga seniorinšenevra Arnt Edmund Ofstad muitala ahte sii ledje plánen doallat rabas čoahkkima Suoma bealde maiddái, muhto korona geažil de fertejedje loahpahit daid plánaid. 

– Mii leat álgoálggus dušše jurddašan doallat báikkálaš čoahkkimiid ja mus lea leamaš gulaskuddan gielddain, ja mii leat dušše ráddjen doallat dušše čoahkkima Juovlavuonas eatge Deanušalddis, go dál leat ain gáržžideamit deaivvademiin. Mis ii leat makkárge vuostemiella lágidit eanet rabas čoahkkimiid, dadjá Ofstad. Son áigu ođđasit váldit oktavuođa Ohcejoga gielddain maŋŋá go Norga ja Suopma rahpe rájá riikkaid gaskka, ja maiddái Deanu gielddain lea go dárbu lágidit eanet čoahkkimiid.

Fanasjohtima detálljaroggama plánadokumeanttat almmuhuvvojit sihke suomagillii ja davvisámegillii geassemánu 16.beaivvi 2020.

-Almmuhus-