Sámi girkoráđđi almmuha dál kr 65 000,- prošeaktaruhtan nannet sámi sálbmalávluma.
Sámi girkoráđđi almmuha dál kr 65 000,- prošeaktaruhtan nannet sámi sálbmalávluma.
Sámi girkoráđi jođiheaddji Sara Ellen Anne Eira čállá preassadieđáhusas sii áigot Sámi girkoráđis ealáskahttit árbevirolaš sámi sálbmalávluma
– Mii dáhttut leat mielde ealáskahttimin sámi sálbmalávlunvieruid ja veahkehit sirdit daid ođđa buolvvaide, dadjá Eira, gii dáhtošii buriid prošeaktaohcamušaid.
Sierra musihkkahápmi
Son čilge ahte sámi sálbmalávlun lea sierra sámi musihkkahápmi mii buolvvaid čađa lea šaddan danin mii dat dál lea, muhto dát árbevierut eai leat šat nu nannosat. Dan dihtii oidnet dárbbu sálbmalávluma árvvu loktet, ja ealáskahttit dan.
20 000 eaŋkilprošektii
Sámi girkoráđđi addá dál kr 20 000,- rádjái eaŋkilprošeavttaide mat leat mielde sámi sálbmalávlunvieruid sirdime ođđa buolvvaide, ja nanneme dáid vieruid.
– Mii jáhkkit ahte gávdnojit ovttaskas olbmot ja birrasat geat háliidit dákkár vejolašvuođa, dadjá Eira. Mii dáhttut prošeavttaid main leat báikkálaš čatnasat ja maid vásáhusaid sáhttá sirdit eará báikkiide, cealká Eira preassadieđáhusas.
