Dáhkádusfitnodat If ja Europeiske Reiseforsikring leat čađahan iskkadeami mas čájehuvvo ahte norgalaččat ballet eanet koronadávdda billistit luomu, go soađis, luondduroasuin ja terroris. Dat mii hirpmahuhttá lea go badjel 400.000 olbmo ballet eanet praktihkalaš váikkuhusain, ovdalii go das ahte sutnje njoammu dávda.
Norgalaččat stuorámus ballu dán geassái lea geavvat sirremii olgoriikkas. Badjel 69 proseantta sis geat vástidedje iskkadeamis vástidedje dán.
Korona-sirren balu maŋis vástidedje ges 66 proseantta olbmuin ahte lea ballu geavvat erremii go boahtá ruoktot. Easka goalmmát sajis lea dakkár ballu mii láve dábálaččat olbmuin go lupmui vulget. Namalassii politihkalaš dilli dan riikkas gosa lea vuolgime.
– Lea mearkkašáhtti ahte dat mii eanemus váikkuha luopmoplánemii lea ballu geavvat sirremii ja erremii koronadili geažil, ja ballu oažžut dávdda lea easka njealját sajis, dadjá If ja Europeiske Reiseforsikringa mátkkoštanekspearta Andreas Bibow Handeland.
Lieggariikii fas vánddardit
Geassemánu 10.beaivvi almmuha FHI kártta mii čájeha gos lea kontrolla njoammuma badjel, ja olgoriikadepartemeantta heaittihit sin mátkkoštanrávvagiid geassemánu 15.beaivvi rájes. Dalle fas lea mátkkoštandáhkádus gustovaš nu go dábálaččat láve, ja norgalaččat geat leat luopmogoikkus besset fas lieggasit riikkaide mátkkoštit.
– Orro dainnalágiin ahte norgalaš ii bala koronanjoammumis nu olu go galggašii. Oallugiidda sáhttá leat stuorat noađđi njoammuduvvot ja buohccát, go vásihit errema dahje sirrema. Mii ávžžuhit ain norgalaččaid geat mátkkoštit olgoriikii maŋŋel geassemánu 15.beaivvi čuovvut errennjuolggadusaid, vuoi mii sáhttit ain joatkit álbmogassii geahččalit bissehit virusa. Mii boahtit dieđusge veahkehit min kundariid báikkiin maid OD dál rahpá, muhto deháleamos lea váruhit vuoi dávda ii čuovo ruoktot, dadjá Handeland.
Mađi boarráseabbo dađi eanet ballu
Logut čájehit maiddái ahte mađi boarráseabbo olmmoš lea dađi eanet lea ballu. Ledje 51 proseantta sis geat leat vuollel 30 jagi geat ballet virusis, ja 67 proseantta 60-jahkasaččaid gaskkas.
– Njoammuduvvot lea okta bealli, muhto váldit njoamu mielde Norgii mielddisbuktá váralašvuođa hearkkes joavkkuide. Danin lea mis If`as leamaš dehálaš dan rájes go pandemiija bođii, doarjut eiseválddiid mátkkoštanrávvagiid, ja boahtit joatkit dainna go OD ráhpá ođđa báikkiide, dadjá Handeland.
Iskosa vuođul boahtá okta juohke goalmmát norgalaččas geahččat makkár dálki orro šaddame, ovdal go mearridit maid áigot dán geasi bargat.
