Finnmárkkus leat dál, loahpageahčen juovlamánu, 1085 olbmo dieđihan iežaset áibbas barggu haga. Bargguhisvuohta lea njiedjan diimmážis ja lea dál 2,7%.
NAV dieđiha preassadieđáhusas ahte 2003 rájes eai leat ná unnán olbmot Finnmárkkus leamaš barggu haga. Ákŋoluokta lea suohkan gos lea eanemus bargguhisvuohta, 9,6%, ja Álttás ja Mátta-Várjjagis ges lea unnimus bargguhisvuohta. Doppe leat 2,1%.
Eambbo dievdoolbmot
Bargosuorgi mas lea eanemus bargguhisvuohta lea industriijabargit. 182 olbmo dán suorggis leat dieđihan iežaset leat barggu haga.
Sii geat leat gaskkal 30 ja 39 jagi leat dávjjimusat bargguheamit. 369 sis geat leat bargguheamit leat nissonolbmot ja 716 lea dievdoolbmot.
Almmuhuvvon barggut
Finnmárkkus leat 267 barggu rahpas ja eanas dain leat Álttás. Doppe leat 82 barggu almmuhuvvon rabas. Eanas barggut leat oahpaheaddjivirggit ja barggut mat gusket dearvvasvuhtii.
Láhppi ja Guovdageaidnu leat suohkanat gos proseanttaid mielde leat lassánan eanemus barggut maŋemus jagi.
