Dál lea nubbi jahki go guolásteaddjit lassánit Norggas. Guollefatnasat leat maid šaddan eambbo, čájehit Guolástusdirektoráhta logut.
– Lea hirbmat buorre ođas go maiddái dán jagi leat eambbosat geat háliidit guolástit. Lea maid illudahtii oaidnit ahte leat eambbo nisson-guolásteaddjit, lohká guolástusministtar Per Sandberg (Ovddádusbellodat) preassadieđáhusas.
– Deháleamos lea ahte guhkit áigge perspektiivvas lassánit gánnihahtti bargosaji riddoguovlluin. Gánnihahtti doaimmat lea buot buoremus guovllupolitihkka, lohká Sandberg.
Eambbo nissonolbmot
Ovddit jagi ledje 9426 olbmo geaid váldodienas lei guolásteamis. Dat lohku lassánii 9493 olbmui 2017:s.
Nissonolbmot leat maid lassánan guolásteamis. 2016:s ledje 273 nissonolbmo, jagi maŋŋil 310 nissonolbmo.
– Buorit áiggit dahket ahte guolástanealáhusas investerejit. Fatnasat leat maid lassánan, ja leat dat unnimus fatnasat mat lassánit. Nuorat maid jotket ealáhusas. Orru buori guvlui manname, lohká Sandberg.
