Dán dálvvi geahččala Stáhta geaidnodoaimmahat ođđa luoddadihkáid.
Luoddadihkát leat dehálaččat sihke dábálaš biilavuddjiide ja maiddái sidjiide geat čorgejit luottaid, erenomážit heajos dálkin.
Divraset go plastihkka
Dál lea Stáhta geaidnodoaimmahat bidjan johtui geahččalanortnega, mas geahččalit ođđamállet luoddadihkáid. Ođđa luoddadihkát galget čuovgat luoddaguoras, dego šleđggon. Dakkár luoddadihkáid oaidná E6:s Sáltoduoddaris, Nordlándda fylkkas.
– Mii háliidit geahččalit ođđa luoddadihkáid mat čuvget, oaidnin dihte lea go dat buoret dálkin ja heajos oainnádagas. Mihttu prošeavttain lea gávnnahit doibmet go dat buorebut, ja šaddet go luottat dorvvolaččabut, lea go álkit vuodjit dálkki čađa ja lea go vejolaš unnidit ahte mii šaddat giddet luottaid dálvet, muitala Stáhta geaidnodoaimmahaga inšenevrajođiheaddji Øystein Larsen preassadieđáhusas.
Ođđa luoddadihkát leat ráhkaduvvon fluoračuovgi ávdnasis, mii lea veaháš divraset go plastihkka, muhto dat galgá čuovgat eambbo ja leat eambbo oidnosis luoddaguoras.
Geahččalit Sáltoduoddaris
Prošeakta čađahuvvo E6:s Sáltoduoddaris. Stáhta geaidnodoaimmahat lea bidjan ovcci iešguđetlágan luoddadihkái, 4 kilomehteraš luddii. Luoddadihkát leat iešguđet ávdnasis ráhkaduvvon, iešguđetlágan ivnniin ja čuovggain.
Lea Mesta fitnodat mii boltu muohttaga Sáltoduoddaris, ja sii galget ge raporteret ruovttoluotta Stáhta geaidnodoaimmahahkii mo doibmet ođđa luoddadihkát.
