Dán vahkku lágiduvvo «Egenberedskapsuka 2022», mas mihttu lea ráhkkanahttit olbmuid vejolaš heahtediliide.
Servodatsihkarvuođa ja gearggusvuođa direktoráhtta (DSB) ávžžuha dállodoalluid ráhkkanit álkes vugiiguin buoridahttit gearggusvuođa ruovttus.
Stáhtahálddašeaddji gaskkusta iežaset neahttasiiddus ahte gearggusvuohta ruovttus lea dál, pandemiija ja Eurohpá soađi dihte, eambbo áigeguovdil go ovdal. Dasa lassin leat cyberáitagat ja garraset dálkkit maid hástalussan.
– Dat sáhttá dagahit ahte kritihkalaš infrastruktuvra jávká, nu go ovdamearkka dihte elrávdnji, čáhci ja mobiilaneahtta, čállá Stáhtahálddašeaddji.
