Ráđđehus lea evttohan bajidit rusttega loktet bargoreaidostipeandda man buohkat geat vázzet joatkkaskuvlla sáhttet oažžut Loatnakássas. Dan ii oaččo jus ii oza, eaige dan daga buohkat. Diimmá skuvlajagi manahedje 20 000 oahppi oktiibuot 40 miljovnna kruvnna ovddas bargoreaidostipeandda.
– Mii eat dieđe manin muhtumat eai oza bargoreaidostipeandda. Mun ávžžuhan buohkaid ohcat dan stipeandda man buohkain, geain lea nuoraidvuoigatvuohta joatkkaskuvllas, lea vuoigatvuohta oažžut, lohká Loatnakássa hálddahuslaš direktevra Morten Rosenkvist.
Oahppit sáhttet ohcat stipeandda go loggejit sisa Loatnakássa neahttasiidduide.
Evttohit lasihit stipeandda
Bargoreaidostipeanda galggašii veahkehit máksit dárbbašlaš reaidduid mat joatkkaskuvlla oahppiin leat oahpamis. Man stuorra stipeandda juohkehaš oažžu, vuolgá guđe oahpahusprográmma sii váldet. Mannan vahkus almmuhii ráđđehus iežaset evttohusa stáhtabušehttii ja das sii evttohit lasihit bargoreaidostipeandda muhtin oahppojoavkkuide. Ráđđehus evttoha lasihit viđát ceahkkái dálá njealját ceahki dásis. Muhtun bargostipeandaceahkit muddejuvvojit 25 proseanttain.
Stipeanda
180 000 joatkkaskuvlaoahppis lea vuoigatvuohta oažžut bargoreaidostipeandda. Skuvlajagi 2021-2022 ledje 15 000 oahppi geat eai ohcan, ja 5000 geat eai vuolláičállán stipeandda, eaige ožžon daid ruđaid.
Loatnakássas leat maid eará stipeanddat. Oahppiin, geat eai sáhte orrut ruovttus, sáhttá leat vuoigatvuohta oažžut stipeandda go eai ása ruovttus. Ráđđehus evttoha maid lasihit dan stipeandda 660 kruvnnain mánnui ja jus dat dohkkehuvvo, de sáhttet oahppit oažžut boahtte jagi stipeanda 5639 kruvnna mánnui. Jus ohppiid váhnemiin lea uhcán tienas, de sáhttá sis leat vuoigatvuohta oažžut tienassorjavaš stipeandda. Čakčalohkanbáji stipeandda ja loana áigemearri lea skábmamánu 15. beaivi ja giđđalohkanbáji áigemearri fas njukčamánu 15. beaivi.
