Miessemánu gávccát beaivvi lea Finnmárkku suodjalanguovllus, HV-17, 75 jagi ávvudeapmi.
Finnmárkku suodjalanguovlu, HV-17, ásahuvvui jagi 1947:s, mii lea ge 75 jagi áigi. HV-17 ruovttusuodjalanguovllus lea dán áiggi militeara ovddasvástádus Finnmárkku fylkka eanaviidosis. HV-17:s lea guovllubargoveahka, árjjabidjanveahka ja ovcci HV-guovllu. Guovllubargoveahka lea Porsangmoen leairras Iŋggášguolbanis Porsáŋggu gielddas. Ossodat lea maid oassi Finnmárkku eanansuodjalusas, čállá HV-suodjalus preassadieđáhusas.
– Norgga davimus ruovttusuodjalanguovlu deavdá 75 jagi ja dat galgá ávvuduvvot. Ávvodoalut álget bearjadaga, miessemánu guđát beaivvi tiibmu 16.00, čájáhus čuoččastemiin oktan leavggain, Garnisonen i Porsanger (GP) šiljus. Das maŋŋá juhkkojuvvo ánssu juohkin ja HV-17 ávvugirji almmuhuvvo. Eahket loahpahuvvo ávvumállásiin bovdejuvvon gussiide, lohká OR4 Sjef Heimevernets Combat media team 3, korporala Jonny Karlsen preassadieđáhusas.
Rabas leaira
Lávvardaga lea GP leaira rabas almmolašvuhtii ja buohkat sáhttet fitnat Iŋggášguolbanis ja oahpásmuvvat singuin geat leat siskkobeale leairaáiddiid. Ruovttusuodjalusa lassin čájeha Porsanger bataljuvdna militeara rusttegiid tiibmu 11.00:s gitta tiibmu 14.00 rádjái.
– Mii sávvat nu olusat go vejolaš fitnet min galledeamen GP:s Iŋggášguolbanis Porsáŋggu gielddas, lohká korporala Jonny Karlsen. Miessemánu gávccát beaivi fuomášuvvo friddjavuođa- ja veteránabeaivin miehtá Finnmárkku, earret eará geigejuvvojit medáljat veteránaide.
