Politiija, Ruovttusuodjalus ja Stáhtahálddašeaddji lágidit ovttasráđiid stuorra konferánssa Álttás cuoŋománu 17.–18. beaivvi man fáddá lea ollislaš suodjaleapmi.
Dán guovttebeaivásaš konferánssas galgá leat sihke riikaviidosaš ja báikkálaš vuolggasadji. Vuosttaš beaivi lea várrejuvvon Servodatsihkkarvuođa ja gearggusvuođa direktoráhta (DSB) direktevrii Elisabeth Aarsætherii, ruovttusuodjalushovdii Morten Eggenii ja Ollislaš suodjaluskommišuvnna jođiheaddjái Harald Sundii muitalit mii ollislaš suodjalus lea.
Rogalándda stáhtahálddašeaddji Bent Høie muitala mo berrešii gulahallat roassodilis. Suodjalusa dutkaninstituhta Therese Sandrup loahpaha beaivvi «Nuorta-Finnmárkku gearggusvuođamuitalusain». Ollislaš suodjalus lea siviilla ja militeara gearggusvuohta mii Norggas lea dustet buot servodaga hástalusaid, soađi rájes gitta eará dáhpáhusaide ja roasuide. Dan dieđiha Romssa ja Finnmárkku Stáhtahálddašeaddji preassadieđáhusas.
Ulbmil konferánssas lea čuvget iešguđet váttisvuođaid dán oktavuođas. Nubbi beaivvi lea várrejuvvon báikkálaš vuolggasajiide. Romssa ja Finnmárkku Stáhtahálddašeaddji gearggusvuođadirektevra Ronny Schjelderup galgá ovttasráđiid Davvi Dearvvašvuođa gearggusvuođadirektevrrain Jonny Broderseniin, HV-17 hoavddain Bernt Lockertain, politiijameaštáriin Ellen Katrine Hættain ja siviilasuodjalusa guovlludirektevrrain Terje Meyeriin muitalit mo dilli lea.
Suohkaniid bealis galgaba Málatvuomi suohkandirektevra Frode Skuggedal ja Ráissa suohkandirektevra Jan Hugo Sørensen muitalit man buorre gearggusvuohta lea ja mo dan sáhtášii nannet.
