Romssa gávpogis lea koronanjoammun duppalastojuvvon vahkkosaččat maŋimuš mánu. Lagabui 1400 olbmo leat isolašuvnnas.
Vuossárgga duođaštuvvui koronavirus 435 olbmos Romssa gávpogis, dieđiha suohkan iežaset neahttasiidduin. Maŋimuš vahkku leat registrerejuvvon 2306 koronanjoammuma.
Eai goassege ovdal leamaš njoammunlogut ná badjin, ja suohkana njoammuneastadandoavttir Trond Brattland dadjá ahte vurdet njoammuma lassánit vel eanet boahtte vahkkus.
– Mannan vahkkus ledje birrasii 300 njoammuma beaivái, dán vahkkus dáidet gaskamearálaččat 500-600 njoammuma beaivái. Mii leat oaidnán maŋimuš mánu ahte njoammun lea lassánan beliin juohke vahkkus, nu ahte boahtte vahkkus sáhttet registrerejuvvot birrasii 1000 koronanjoammuma beaivái, lohká Brattland Nordlys aviisii.
Oktiibuot leat Romssas 1393 olbmo isolašuvnnas maŋŋebárgga.
