Birrasii 3500 studeantta ožžot orrun- ja mátkedoarjaga hárjehallanáigodahkii.
Norgga gielddat rahčet oažžumis doarvái dearvvašvuođabargiid. Ráđđehus lea juo ásahan máŋga oahpposaji, muhto juohke oahpposaji ferte čuovvut hárjehallansadji.
Doarvái práksissajit leat dehálaččat jus galget doarvái dearvvašvuođastudeanttat gárvet oahpu. Ráđđehus juolluda eambbo ruđa gokčat orrun- ja mátkegoluid dearvvašvuođa- ja sosiálafágastudeanttaide geat ožžot hárjehallansaji guhkkin eret universitehtas.
– Mii juolludit 52 miljovnna ruvnno stipendii dearvvašvuođa- ja sosiálafágastudeanttaide geain lea hárjehallansadji guhkkin eret oahppobáikkis. Dat lea buorrin buohkaide. Birrasii 3500 studeantta ožžot doarjaga hárjehallisadjái ja máŋga boaittobealsuohkana sáhttet vuosttaš geardde fállat hárjehallisajiid. Mii diehtit ahte studeanttat, geat leat leamaš hárjehallamis muhtun suohkanis, dávjá váldet maid barggu doppe maŋŋel, dadjá dutkan- ja alitoahppoministtar Sandra Borch.
Ođastuvvon nationálabušeahtas 2023 várás juolludii ráđđehus 20 miljovnna ruvnno doarjjaortnegii. Dasa lassin lea ráđđehus árvalan 31,9 miljovnna kruvnno 2024 stáhtabušeahtas. Oktiibuot juolluda ráđđehus lagabui 52 miljovnna ruvnno logi universitehtii ja allaskuvlii.
