Romssa suohkanis leavvá koronanjoammun, ja vuordimis joatkašuvvá ná. – Mii oaidnit ahte koronanjoammun lassána vahkkoloahpaid maŋŋel go olbmot leat leamaš olgobáikkiin, dadjá suohkana njoammuneastadandoavttir Trond Brattland.
Geassemánu 30. beaivvi duođaštuvvojedje oktiibuot 19 ođđa koronanjoammuma Romssas. Eanaš njoammumiid nákcejit guorrat njoammundilálašvuhtii mii leamaš maŋimuš áiggiid.
– Romssas leat alla njoammunlogut ja danin lea hástaleaddji čađahit njoammunguorramiid. Seammás lea oadjudeaddji go diehtit gos eatnašiidda lea njommon koronavirus. Eanaš koronanjoammumiid nagodit čatnat muhtin sosiála deaivvadeapmái mii lei mannan vahkkoloahpa, lohká Romssa suohkana njoammuneastadandoavttir Trond Brattland.
Romssas leat 64 olbmo isolašuvnnas ja 166 olbmo erremis. Brattland ii hirpmahuva jus njoammunlogut lassánit vel eanet.
– Mii oaidnit čielga minstara maŋŋel vahkkoloahpaid. Go okta dahje moadde olbmo geain lea koronavirus oassálastet sosiála ovttastallamis dahje galledit muhtin olgobáikki, de njoammu koronavirus máŋgalot olbmui. In hirpmahuva jus ná joatkašuvvá čuovvovaš vahkkoloahpaid. Oallugat leat eanet sosiála ja servodat lea eanet rahpasan, muhto nuoramusat eai leat vel boahkuhuvvon, čilge son.
