Mannan vahkus bulii «Polarbröd» láibefabrihkka gutnan. Dál dieđiha «Polarbröd» nammasaš fitnodat ahte 131 fabrihkabargi masset barggu Älvsbyas.
Älvsbyas orrot 5000 olbmo ja láibefabrihkka lei gieldda stuorimus bargoaddi. Dál masset 131 fabrihkkabargi barggu.
– Dat lea surgadis beaivi midjiide muhto mis ii leat eará čoavddus juste dal. Muhto mii plánegoahtit hukset ođđa láibefabrihka deike, muhto dat ádjáná guhkes áiggi ovdal dat ceaggana, čilge konseardnahoavda Karin Bodin SVT Nyheterii.
Ruoŧa stádaministtar lea maid galledan Älvsbya maŋŋel buollima ja Ruoŧa ráđđehus lea lohpidan veahkehit gieldda ja fabrihkkabargiid gávdnat eará bargguid muhto maid nannet fabrihkkabargiid gelbbolašvuođa. «Polarbröd» nammasaš fitnodat geavaha maid eará láibefabrihkaid gos sáhttet buvttadit iežaset buktagiid gaskaboddosaččat.
