Navdojuvvon roavva veahkaválddálašvuohta galgá leat dáhpáhuvvan čakčamánu 8. beaivvi unna gilážis Girona gielddas.
Njealjátlotjahkásaš dievdu lea áššáskuhtton roavva veahkaválddálašvuođas. Okta čihččetlotjahkásaš almmái lea garrasit roasmmohuvvan dáhpáhusas ja lea dolvojuvvon Upmeje buohccevissui dikšui, nu čállá NSD aviisa.
Áššeguoddi Jonas Fjellström dadjá NSD aviisii ahte lea sáhka roavva veahkaválddálašvuođas mii lea dáhpáhuvvan lagas bearrašis.
– Lea riidu bearrašis leamas. Okta čihččetlotjahkásaš almmái lea garrasit roasmmohuvvan ja son lea ain divššus. Ii leat heaggavaralaš, muhto son lea bahuid roasmmehuvvan ja sáhttá oažžut bistevaš gorutváttuid. Maiddái nubbi almmái seamma bearrašis galgá leat cápmahallan seamma albmái. Son ii leat bahuid roasmmehuvvan.
Ruoŧa boles válddii njealjátlotjahkásačča gitta sotnabeaičuovganeapmái. Dievdu navdojuvvo sivalažžan roavva veahkaválddálašvuođas ja lea áššáskuhtton áššis. Son lea ovdal sivahallon roavva veahkkalválddalašvuođas, muhto ii leat ovdal dubmehallon.
Jiellevárri diggeriekti galgá mearridit gaskavahku galgá go almmái čohkkát háldogiddagasas vai ii.
