Váhnen Roy Evert Guttorm ii jáhke gal ahte Kárášjoga gielda háhppeha geasis njulget boasttuvuođaid skuvllas.
Váhnen Roy Evert Guttorm ii jáhke gal ahte Kárášjoga gielda háhppeha geasis njulget boasttuvuođaid skuvllas.
– Guhkkin eret jáhkán sii dan nagodit. Leat dušše guoros lohpádusat. Movt áigu sátnejođiheaddji geasseluomus nagodit njulget dili mii ii leat njulgejuvvon guovtti jagis. Diet maid dadjá, gal lea measta bilkideapmi!
Nu dadjá váhnenolmmoš Roy Evert Guttorm geas leat mánát Kárášjoga mánáidskuvlla 6B luohkás.
Leat heiveheame plánaid
Sátnejođiheaddji Anne Toril Eriksen Balto čilge Ávvirii maid oaivvilda. Son lohká gieldda fertet čuovvut fylkkamánni áigemeari mii lea borgemánu 20. beaivvi. Ja go divvot dieid áššiid, mat maiddái gusket váilevaš oahpaheaddjidillái, de galgá ollu juo buorránit.
– Mun dieđán skuvla lea leamaš pláneme boahtte jagi luohkáid ja ráhkadan plánaid. Dakko bokte galget sihkkarastit buohkaide buoret dili skuvllas. Dan sii dahket juohke jagi, ja mun sávan ahte bidjet guhkes áiggi vuollái plánaid vai buohkat dihtet movt šaddá.
Dan dadjá sátnejođiheaddji ja lasiha ahte lea buorre go váhnemat leat váldán ovdan áššiid vai daid sáhttá njulget dili.
Nrk Sápmi dat lea dán vahkus muitalan 6B luohká váhnemiid duhtameahttunvuođa birra
Váilot oahpaheaddjit ja plánat
Váhnemat moitet skuvlla ja čuoččuhit ahte skuvlajođiheaddjit eai leat beroštan addit doarvái buori oahpahusa sin mánáide.
– Guokte jagi leat mii váidalan dan dili masa min mánát leat šaddan, muhto eai sii váldde vuhtii, dadjá váhnen Siri Linn Berg NRK:ii. Sii moaitigohte dili go váldooahpaheaddji vuos sirdui vuosttaš luohkkái. Dan rájes leat 6B:s dávjá váilon oahpaheaddjit, leat leamaš olu sadjásaš oahpaheaddjit ja mánnoviissaid leat váilon oahpahanplánat.
Maiddái Finnmárkku Fylkkamánni lea fuomášan boasttuvuođaid Kárášjoga skuvllas ja gáibidan sii njulgejit vihtta čuoggá maiguin skuvla rihkku oahpahuslága.
Ieža oahpahit
Roy Evert Guttorm ja su eamit leaba maid vuohttán čielgasit ahte oahpahus ii leat dohkálaš skuvllas.
– Lea lossat juohke beaivvi oahpahit mánáid. Váhnemat šaddet geavahit olu áiggi oahpahit mánáide dan maid eai leat oahppan skuvllas, čilge son.
Dovdá givssiduvvon
Guttorm maid váillaha gielddapolitihkkáriid dán áššis, ja son imaštallá manne eai leat reageren vaikko Fylkkamánni lea duođaštan ahte skuvla rihkku lága.
– Gosa leat sii šaddan go ii báljo oktage jietnat dan birra maidege? Dát han lea politihkkáriid ovddasvástádus maid, gulaskuddat sáhttá go vuoruhit earáládje ruđaid vai movt sáhttá dili čoavdit. Dat orru mu mielas hui ártet, go lea čielggas ahte gielda rihkku lága skuvlladiliid, dadjá son. Guttorm čuoččuha maid ahte dát luohkká, mii lea dárogielat luohkká, givssiduvvo dan geažil go leat dárogielagat.
– Mun gal dovddan ahte mun ja mu bearaš givssiduvvot go mánát leat dárogielagat. Dát ášši lea nu vearrái ahte mii gal árvvoštallat fárret eret Kárášjogas, muhto mii eat áiggo gal vuollánit dáinna áššiin, dadjá son.
Lohpida čuovvut
Sátnejođiheaddji Eriksen Balto ii loga dakkár dili leat dohkálažžan, ja lohpida čuovvut politihkalaš dásis njulget go áššit skuvllas.
– Mun in dovdda dien beali ahte dovdet givssiduvvon. Muhto ii galgga dáhpáhuvvat ahte muhtimat dovdet givssiduvvon, go buohkain lea seamma árvu. Dál fertet čuovvut dárkilit mii dáhpáhuvvá, ja bivdit dieđuid maiddái politihkalaš dássái sihke oanehit ja guhkit áiggi vuollái, dadjá son.
