Sámediggi vuosttalda Ruošša militearalaš Ukraina-falleheami ollásit. Dan celkkii Sámedikki dievasčoahkkin.
Sámediggi celkkii čuovvovaččat Sámedikki dievasčoahkkima vuosttaš beaivvi, njukčamánu gávccát beaivvi 2022.
Sámediggi vuosttalda Ruošša militearalaš Ukraina-falleheami ollásit. Sámediggi dovddasta Ukraina iešheanalaš ja sorjjasmeahttun stáhtan mas lea territoriála rihkkumeahttunvuohta. Dat falleheapmi lea duođalaš álbmotrievtti rihkkun. Sámediggi doarju ON ja earáid, dás maid Davviriikkaid stáhtaid, gáibádusaid ahte Ruošša dakkaviđe bisseha falleheami ja ohcá ráfálaš čovdosa.
Lea dehálaš álggahit doaimmaid mat veahkehit siviilaálbmoga mii gillá, sihke Ukrainas ja Ruoššas, nu jođánit go sáhttá. Sámediggi, politihkalaš ásahussan, dáhttu veahkkin gávdnat čovdosiid mat leat buorrin álgoálbmogiidda mat váikkuhuvvojit soađis, sihke lagaš ja guhkit áiggi váikkuhusain. Sámediggi ávžžuha Norgga ráđđehusa vákšut olmmošvuoigatvuođadili, čállá Sámediggi preassadieđáhusas.
