Searvvit NOAH ja Foreningen Våre Rovdyr gáibidit geassit ruovttoluotta báhčinlobi.
Elliidsuodjalanorganisašuvnnat reagerejit garrasit go Dálkkádat- ja birasdepartemeanta addá lobi báhčit njiŋŋelasguovžža mas leat guokte čivgga Snoases ja Steinkjer suohkaniin Trøndelágas. Organisašuvnnat ovddidedje ikte gáibádusa eastadit dan báhčima.
– Dát lea suorggahahtti ja lobihis mearrádus. Lea vuosttaš geardi Norgga boraspirehálddašeamis go addet lobi báhčit čivgaguovžža čivganáiggis. Dát lea hui duođalaš signála luondduheahtedilis, go Norga lea geahččalan čájehit ahte lea dakkár našuvdna mii áigu áimmahuššat áitojuvvon luonddu. Guovžžain eai leat dasa lassin doarvái buorit eallinguovllut Norggas. Lea heahpat go departemeanta lea geavahan guovlluhálddašeami váldoággan báhčit guovžžaid, vaikko ovdal leat dovddastan ahte guđat guovllu guovlojuohku iešalddis rihkku lága, dadjá NOAH searvvi jođiheaddji Siri Martinsen.
