Govdu Ruošša atomarusttet Akademik Lomonosov lea jođus Murmánskii, ja manná Norgga rittu meattá dáid beivviid.
Murmánskkas bidjet atomaboaldámušaid govdunrusttegii, ovdal go čavgejit viidáset Sibirjjá rittu guvlui. Doppe galgá atomarusttet buvttadit el-rávnnji ovtta gávpogii rittus ja eará oljorikkiide.
Norgga eiseválddit ledje diibmá jo kritihkalaččat ruoššaid plánaide geasehit atomarusttega nu lahka Norgga rittu. Maŋŋel Norgga ja Ruošša eiseválddiid ságastallamiid šadde ovttaoaivilii ahte eai galgga leat atomaboaldámušat fatnasis ovdal go ollejit Murmánskii.
Hearkkes guovllut
Lávvordaga dieđihuvvui ahte skiipa lea guođđán St. Petersburga ja ahte galgá geasehuvvot Nuortamearas ja Norggarittu meattá.
Go leat lokten atomaboaldámušaid skiipii, de galgá fievrreduvvot viidáset hearkkes árktalaš guovlluid guvlui.
Luonddugáhttejeaddjit leat kritihkalaččat dán prošektii ja gohčodit Akademik Lomonosov leat «govdu Tsjernobylan».
Ballet lihkohisvuođain
Bellona ballá mii sáhttá dáhpáhuvvat go sirdet skiipa Murmánskkas Pevjekii mii lea oarjjabealde árktalaš guovllu Ruoššas.
– Mii ballat ahte lihkohisvuođat sáhttet dáhpáhuvvat j usatomarusttet bártahuvvá guovlluin gos dálki lea garas ja lea váttis fállat teknihkalaš veahki jus lihkohisvuohta dáhpáhuvvá, lohká Bellona beaivválaš jođiheaddji Nils Bøhmer.
Son lohká ahte Akademik Lomonosov galgá meattá guovlluid mat leat hearkkit nuoskkidemiide, ja ahte ii leat vejolaš čorget jus rádioaktiivva suođđan dáhpáhuvvá.
Ruošša birasgáhttejeaddjit maid reagerejit
– Govdu atomarusttegis leat guokte reaktora, ođđa rusttet ja ođđa bargoveahka. Nu ahte rusttet lea riska, ja olbmot Murmánskkas livčče galgan oažžut vejolašvuođa searvat almmolaš gulaskuddamiidda, Ruošša lágaid ektui. Gulaskuddamat leat leamaš Pevjekas Tsjukotkas, gosa rusttet lea jođus ja galgá bisánit, muhto livčče galgan leat gulaskuddamis Murmánskkas maid, lohká Oleg Bodrov preassadieđáhusas, gii lea luonddugáhttenlihttu ovttasbargoguoibmi Ruošša birasgáhttenlihtus.
Geahččalit Norgga ráji lahka
Luonddugáhttenlihttu dieđiha ahte fertejit leat gozuid alde ja čuovvut mielde mii dáhpáhuvvá ránnjáriikkas. Akademik Lomonosov galgá geahččaluvvot Murmánskkas, mii lea okta dain gávpogiin mat leat lagamusas Norgga ráji. Atomarusttet galggai rievtti mielde geahččaluvvot St. Petersburgas, muhto gávpoga ássiin lei garra vuosteháhku dasa, ja eará riikkat maid vuostálaste geasehit sin meattá atomarusttega mas lea atomaboaldámuš.
– Olbmuid mielas ii lean nu buorre jurdda geahččaladdat atomarusttega gasku St. Petersburga, ja govdu atomarusttet ii leat buorre jurdda oba ge, deattuha Bodrov Norgga Luonddugáhttenlihtu preassadieđáhusas.
