Lei vuolleahkásaš bárdni gii sáddii áitagiid Čáhcesullo mánáid- ja nuoraidskuvlii mánnodaga.
Áitta bođii e-boastta bakte go skuvllas lei pride-oahpahus. Áitaga geažil fertejedje buot mánáid sáddet ruoktot, ja skuvla giddejuvvui. Politiijat nagodedje gávdnat vuolleahkásaš bártni gii lei sádden áitagiid skuvlii. Son lei eará politiijaguovllus Lulli-Norggas.
– Vuolleahkásaš bártnis, gii sáddii áitagiid Čáhcesullo mánáid- ja nuoraidskuvlii mánnodaga, ii lean áigumuš čađahit áitagiid. Mii, politiijat, leat ipmirdan ahte son háliidii baldit. Čáhcesullo gielda ja politiijat muitalit ahte skuvllas ii lean váralaš áitaga dihte, dadjá politiija Endre Grane preassadieđáhusa bakte.
Finnmárkku politiijat isket dál viidásit ášši. Čáhcesullo mánáid- ja nuoraidskuvla lea maid plánen lágidit pride-doaluid.
– Mii leat árvvoštallan ahte árgabeaivi sáhttá joatkit nu go dábálaččat. Mii geahččalit ráhkadit dorvvolaš báikki ohppiide, váhnemiidda ja oahpaheddjiide go bohtet skuvlii, dadjá politiija Endre Grane.
