Mánáid ja nuoraid oahppanmokta njiedjá jagis jahkái vuođđoskuvllas, ja 10.luohkká ohppiin lea unnimus motivašuvdna skuvlabargguide.
Oallugat gárvejit nuoraidskuvlla heajos bohtosiiguin. Dál háliida ráđđehus gávnnahit čovdosiid dasa.
– Olu oahppit ja nuorat muitalit ahte sis ii leat motivašuvdna, sii láittastuvvet ja váivašuvvet go galget vuolgit skuvlii. Oallugat guđđet nuoraidskuvlla bohtosiiguin mat sáhttet dagahit boahtteáiggi hástaleaddjin. Dan mii fertet váldit duođalaččat. Dat lea olu mii lea buorre skuvllas, muhto áigi lea láddan dahkat 5.-10. ceahki eanet praktihkalažžan ja molssolažžan, vuoi oahppit ohppet eanet ja loktet buorebut, dadjá máhttoministtar Tonje Brenna.
Čielggadit čuolmmaid
Stuorradiggedieđáhusa bokte galgá ráđđehus erenomážit vástidit golbma váldočuolmma:
1. Menddo máŋga máná ja nuora vásihit psyhkalaš váttisvuođaid ja streassa.
Olu šearbmageavaheapmi váikkuha árgabeaivvi.
2. Menddo máŋga oahppi guđđet nuoraidskuvlla heajos bohtosiiguin.
Oahppanmokta lea vuolimusas 10.ceahki ohppiid gaska, muhto daid maŋimuš jagiid lea maiddái mánáidskuvllas vuhtton negatiivvalaš ovdáneapmi motivašuvnna ektui. Danne galgá dát dieđáhus guorahallat 5.ceahkis gitta 10.ceahki rádjái dan oktavuođas. Dat lea dehálaš ráhkadit lunddolaš sirdašumi mánáidskuvllas nuoraidskuvlii, dieđiha ráđđehus sin preassadieđáhusas.
Molssolaš oktasašskuvla
Dieđáhusbarggus háliida ráđđehus čielggadit ferte go dahkat rievdadusaid, vuoi šaddá álkit almmolaš skuvlii fállat eanet molssolaš fálaldaga. Ráđđehus lea váldán eret vejolašvuođa ásahit ođđa priváhta profiilaskuvllaid ja fidnofágaskuvllaid. Almmolaš skuvllat galget maid oažžut saji geahččalit ođđa vugiid.
– Ráđđehus háliida ahte lea oktasašskuvla mii lea molssolaš ja nu buorre ahte buot oahppit loktet. Dat mearkkaša ahte oahppit geat ovdamearkka dihte háliidit eambo valáštallama nuoraidskuvllas, sii eai galgga dárbbašit válljet priváhtaskuvlla ollašuhttin dihte iežaset sávaldaga, loahpaha Brenna.
