Guđas logi Norgga biilavuoddjis dovdet hárve dahje eai goasse dorvvuhisvuođa gálja luottas čájeha ođđa iskan. – Badjelmearálaš jáhkku alcces stivrrana duohken dagaha stuorát risikka lihkohisvuođaide, dadjá Codan Forsikring Georg Richvoldsen.
Norstat-iskamis vástiduvvo ahte njealjis logi olbmos muhtumin dahje álo dovdet dorvvuhisvuođa gálja luottas.
Guđas logi olbmos fas vástidit ahte hárve dahje eai goasse dovdda dorvvuhisvuođa gálljan.
Dán dálvvi lea leamaš váttis vuodjinsiivu miehtá riikka. Luoddajohtolatguovddáš lea fas várohan gálja luottaid.
– Unnit leahtu ja ale vuoje nu lahka eará biillaid, ávžžuhit sii.
Eambbo lihkohisvuođat gálljin
Gálja luottat dagahit váttis vuodjinsiivvu ja eambbo lihkohisvuođaid luottaid alde.
Muhto olu lihkohisvuođaid gálja luottas livččii sáhttán garvit.
– Olu lihkohisvuođat dálvet gevvet go biilavuoddjit eai unnit leahtu doarvái go lea olu muohta ja jiekŋa. Nu álki, ja nu váttis, dadjá Georg Richvoldsen, Codan Forsikring gulahallanhoavda preassadieđáhusas.
Badjelmearálaš jáhkku iežas čehppodahkii
Go olu vuoddjit eai heivet leahtu go heajos siivu lea, de orru badjelmearálaš jáhkku iežaset vuodjinčehppodahkii.
– Ii galgga ballat stivrrana duohken. Muhto go iskan čájeha ahte guđas logi olbmos hárve dahje eai goasse dovdda dorvvuhisvuođa gálja luottas, de sáhttá jáhkkit ahte oallugat vudjet mahká dorvvolašvuođain gálja luottain, dadjá Richvoldsen.
Dievdduin lea buoremus iešdovdu
Norstat-logut čájehit ahte dievddut leat eambbo oadjebasat gálja siivun go nissonolbmot.
Dievdduid gaskkas lea badjel 70 proseantta geat vástidit ahte dovdet hárve dahje eai goasse dorvvuhisvuođa gálja luottas.
40 proseantta nissonolbmuin vástidit dan seamma.
– Dievddut leat dávjjit lihkohisvuođain go nissonolbmot. Olu dievdduin sáhtášii stuorát respeakta váttis vuodjinsiivui, dadjá Richvoldsen.
Vihtta rávvaga mo sihkkarastit dálvevuodjima:
- Geahča dálkki ja siivvu. Árvvoštala guođđit biilla.
- Heivet leahtu siivui.
- Dárkkis ahte leat buorit dálvejuvllat.
- Oahpa mo goazanat doibmet váttes siivun.
- Dárkkis ahte du leat dárbbašlaš reaiddut biillas.
