Sámi nuorat vuite guokte golli ja golbma silbba sprinta friijavuogi čuoigamis Arctic Winter Games maŋimuš gilvvohallan beaivvi Nuuk gávpogis.
Sámi nuorat vuite guokte golli ja golbma silbba sprinta friijavuogi čuoigamis Arctic Winter Games maŋimuš gilvvohallan beaivvi Nuuk gávpogis.
Arctic Winter Game (AWG) 2016 dahje Árktalaš Dálveriemuid maŋimuš gilvvohallanbeaivvi, njukčamánu 11. beaivvi, vuite sámi čuoigit vihtta medáljja sprinta friija vuogi čuoigamis Nuuk gávpogis Kalaallit Nunaatas dahje Ruonáeatnamis.
– Lei buorre dálki, birrasii logi buolašgráda ja goalki. Nuorain ledje buorit sabehat ja čuige bures. Oktiibuot vuite min čuoigit vihtta medáljja, golbma silbba ja guokte golli. Mu mielas lei hirbmat buorre gilvu, lohká Team Sápmi váhnen ja sabetvuoidi Janne Rytky.
Son muitala leamaš buozalmasvuohta čuigiid gaskkka ja Vilma Rytky, Ida Storjord Tovås ja Hillá Portti eai oasálastán bearjadaga čuoigamis. Su mielas leat junior gánddat čuoigan bures, erenoamážit go diehtá sii leat nuorat go 17 jagi.
Bohtosat šadde ná:
Nuoramus luohkás, 13-14 jahkásaččat, čuige 600 mehtera. Nieiddaid luohkás vuittii Ina Nylund silbba. Nummar 9 Katrine Storjord Tovås. Gánddaid luohkás vuittii Sverre Hansen golli. Nummar 9 Johan Ailo Eira ja nummar 11 Fredrik Olufsen.
Gaskaahkásaš luohkás, 15-16 jahkásaččat, čuige 750 mehtera. Nieiddaid luohkás vuittii Oda Johanne Andreassen golli. Gánddaid luohkás vuittii Simon Åstot silbba. Nummar 5 Marcus Åshovd, nummar 11 Aslak Mikkel Bals ja nummar 14 Antti-Olavi Rytky.
Junior luohkás, 17-18 jahkásaččat, čuige 750 mehtera. Nieiddaid luohkás vuittii Amalie Storjord Tovås silbba. Nummar 5 Trine Agersborg Skånhaug ja nummar 11 Marte Agersborg Skånhaug. Gánddaid luohkás bođii Jens Johan Brekke ovccádin, nummar 11 Elias Knutsen ja nummar 13 Hans Erik Sandelin. Oktiibuot leat sámi nuorra čuoigit vuoitán 18 medáljja.
