– Don leat šaddan Nabolaget-miljoneara, lei diehtu maid Ellen Sara Helene Sokki oaččui ikte eahkedis.
Lea Norsk tipping mii čállá dan.
Guovdageaidnulaš Ellen Sara Helene Sokki illá jáhkii maid Norsk Tipping riŋgii almmuhit sutnje bearjadaga eahkeda.
– Don leat eahkeda vuosttašvuoittu fasken ja vuoitu lea miljovnna ruvnnu. Don leat šaddan Nabolaget-miljoneara, celkkii Norsk Tipping go riŋgeje Sokkii.
– Maid logat, jearralii hirpmahuvvan Sokki.
Ođđa biilla áigu
Sokkii ii lean Norsk Tipping dieđuid mielde okto go oaččui dan dieđu. Sii geat ledje seamma lanjas jearahišgohte mii dál lea.
– Lean šaddan miljonearan, dadjalii son movttegit ja nu illosedje buohkat geat das ledje.
56-jahkásaš guovdageaidnulaš illuda dál báŋkokonttu iskat. Son lea lohkan Norsk Tippingii ahte ii áiggo stajidit ruđa, muhto ahte udno gal bearrašii juoidá.
– Unna luopmomátkki Ruŧŧii gal vuolgit. Ja de jáhkán mun lonuhan ođđasat biilii, celkkii son Norsk Tippingii.
Sokki lei deavdán 5-vahkosaš Nabolaget-searvama golbma beaivvi ovdal go vuittii.
Vihtta ránnjá sus vuitet 100 000 ruvnnu guhtege. Lea nuppes go muhtin Guovdageainnus vuoitá dán speallamis dán jagi.
