Deanu nisu vuittii šattai ikte «Nabolaget-miljonearan», dasa lassin vuite vihtta su lagamus ránnjáin 100 duhát ruvnno guhtege.
Deanu nisu vuittii šattai ikte «Nabolaget-miljonearan», dasa lassin vuite vihtta su lagamus ránnjáin 100 duhát ruvnno guhtege.
– Dájut go? Mun in dieđe maid galggan lohkat, dajai «Nabolaget» miljonvuoiti bearjadaga go Norsk Tipping riŋgii sutnje.
Deatnulaš nisu
Vuoiti lea deatnulaš nisu, guhte muitala ahte sutnje lea váttis áddet mii dáhpáhuvvá, čállá Norsk Tipping preassadieđáhusastis.
– Mun lean šohkas, njulgestaga! In leat ádden mii lea geavvan, lohká son.
Miljoneara ránnját vuite maid
Miljonvuoiti vihtta lagamus ránnjá, geat maid leat speallan dán spealu, vuite 100 duhát ruvnnu guhtege.
Sii gal illudedje jitnosit go Norsk Tipping riŋgii buriid ságaiguin.
Boazodoalli
Ivvar Ailu Utsi (27) lei okta sis:
– Dát de lei somá! Mun ožžon veaháš šohka go oidnen SMS-dieđu mas «Nabolaget-geassin» oidnui, lohká Ivvar Ailu duđavaččat.
Son lea boazodoalli ja logai áigut ávvudit veaháš bearjadateahkeda.
– In dieđe vuos masa golahan ruđa, muhto mus lea hui miella ođđa biilla oastit, lohká son.
Oarpmealli maid vuittii
Nubbi vuoiti lei studeanta Sonja Kristine Hegge Guttorm (25), guhte lea Ivvar Aillu oarpmealli.
– Dál gal ribahan čierrut, lohká son go gullá iežas vuoitán 100 duhát ruvnno.
Son lea juste shoppemin go oažžu dieđu.
– Dál gal dorggiidan. In lean goassege jáhkkán ahte oaččon dákkár sága telefon bokte. Duhát giitu! Dál áiggon shoppet, lohká son,
– Dál šaddet juovlaskeaŋkkat
Leif Jakobsen (49) lea ges goalmmát vuoiti Deanus.
– Dál leat ávvudeamen olles leavttus, lohká Leif go Norsk Tipping riŋge.
Son lei musihkkajoavkkuin hárjehallamin go fuomášii ahte lea vuoitán 100 duháha, hárjehallama gal gaskkalduhtii de.
– Dál šaddet erenoamáš buorit juovlaskeaŋkkat mánáide. Dasa lassin lean ávvudeamen iežan 50-jagi beaivvi Nashvilles golggotmánus, dalle boahtá liige lupmaruhta buorrin, lohká son.
Dollejit juovlanigá guossái
Njealját vuoiti Deanus lea Fred Norvald Aslaksen (42).
– Lean go vuoitán 100.000 ruvnno? JUA!! Duhát, duhát giitu, huikkáda Fred.
Duogábealde gullojit earát ge ávvudeamen.
– Dát heivii duođaid bures! Dál gal šaddá mátki juovlanigáriikii Supmii bearrašiin, lohká Fred duđavaččat.
Dasa lassin lea vel okta nisu Deanus vuoitán 100 duhát ruvnno, muhto Norsk Tipping ii leat su fáhten ságaide.
Vihtta vuoiti
Bearjadaga eai beassan dušše Deanus ávvudit, vihtta eará báikki gessojedje maid vuoitin.
Váldovuoitit dáid báikkiin vuite 100 duhát ruvnno guhte ge, ja sin ránnját geat leat speallan dán spealu vuitet guhtege gaskkal 10 duhát ja 50 ruvnno.
Vuoitit ledje Gravbergetis, Moldes, Sandnesas, Larvikas ja Oslos.
