Vaikke Nuorttanaste bláđđi leage jo 117-jahkásaš de dat ge čuovvu digitála ovdáneami. Geahča video:
Odne almmuhii Nuorttanaste bláđđi iežaset ođđa neahttasiiddu. Váldodoaimmaheaddji Liv Tone Boine, lohká ahte vaikke bláđđi leage 117-jagi boaris, de dat ii liikká leat boaresáigásaš. Ja dál lávkejit ge sii maid digitála máilbmái.
Nuorttanastes lea dán rádjai leamašan gal neahttasiidu, muhto doppe leat gávdnon dušše dieđut bláđi birra. Ođđa neahttasiiddu bokte almmuhišgohtet maiddái áššiid.
– Mii eat dieđe vuos man dávjá mis bohtet áššit nehttii, go eai mis leat nu máŋga bargi. Seammás fertet maid vuoruhit báberhámat bláđi, go dat galgá ain leat min váldobuvtta, čilge Boine.
Besset dalán almmuhit
Son muitala iežaset mearridan hahkat ođđa neahttasiiddu vai olahit eambbosiidda.
– Vai earát ge besset diehtit min birra ja Nuorttanaste lea dehálaš jietna sámeservodagas. Das lea veahá earálágan áššit, das leat kristtalaš áššit maid dávjá eará mediat eai ovdanbuvtte. De leat máŋgii maid fuomášan ahte leat muhtin áššit mat heivešii Nuorttanastai muhto mat eai heive dan báberbláđđái go manná nu guhkes áigi ovdal go deaddiluvvo, dadjá Boine.
Neahttasiiddu oainnát nuorttanaste.no siiddus.
Geahča video rahpamis:
