Vihtta olbmo dušše heavvananlihkohisvuođain miessemánus. Dán rádjái leat 25 olbmo heavvanan Norggas. Dasa lassin leat guokte Norgga stáhtaboargára heavvanan olgoriikkas, čájeha Redningsselskapet heavvananstatistihkka.
Guokte heavvaneami gevve Rogalánddas, goappašagat go leaba gahččan čáhcái. Viđajahkásaš nieiddaš gávdnui jápmán merrii Stavangeris maŋŋel go lei jávkan ruovttus. Egersunddas gávdne badjelaš 60-jahkásaš albmá mearas.
Geassi lea allaáigodat heavvananlihkohisvuođaide. Gaskamearálaččat leat 40 proseantta buot heavvanemiin gaskal geassemánu ja borgemánu.
– Smiehta mo geasi tuvrrat fatnasis, sáttogáttis ja meara bokte sáhttet leat nu dorvvolaččat go vejolaš. Gearddut mearra- ja lávggodannjuolggadusaid, ja čuovo daid! dadjá Tanja Krangnes, Redningsselskapet heavvananeastadeami fágajođiheaddji.
Sii maid ávžžuhit buohkaid oahppat álkes heaggagádjuma ja mo čađaha váibmo- ja geahpesgádjuma.
– Olusat gáddjojuvvojit go muhtun lahkosis fuomáša ja diehtá maid galgá bargat, dadjá Krangnes.
