Gádjunsearvi Redningsselskapet dieđiha dan guovtti davimus fylkkas lassánii sin veahkkebargu. Ohcan- ja gádjunbarggut leat unnon.
Oktiibuot veahkehedje gádjunfatnasat 539 dábálaš veahkkebarggu Romssas ja Finnmárkkus 2023:s, mii lea guhtta proseantta eanet go dan ovddit jagi. Duođalaš dáhpáhusain ledje 48 ohcan- ja gádjunbarggu meara alde ja dan ovddit jagi ledje 56.
Earret ohcan- ja gadjunbarggu Romssas ja Finnmárkkus, de leat leamaš 218 veahkkebarggu ja 164 havariijaveahki. Riikadásis leat maŋimuš jagiid eambbo fatnasat go ovdal vuodján coahkásii ja dat vuhtto maid Romssas ja Finnmárkkus gos 2023:s leamaš 14 coahkásii vuodjima 2022 ektui goas ledje 6 coahkásii vuodjima. Oktiibuot lea Redningsselskapet veahkehan 405 fatnasa ja 1105 olbmo ja 97 veahkkebarggu ledje cuoŋománus.
– Mannan jagi lei molsašuddi dálki, divrras elrávdnji ja áigodagat goas astoáiggefanasjohtolat leamaš uhcit go dábálaš. Dan oaidná bargostatistihkas ja oppalaččat unno veahkkebarggut diibmá. Dattege leamaš olu duođalaš dáhpáhusat ja gadjumat meara alde, lohká Redningsselskapet gearggusvuođahoavda Tom Haakenstad.
Diibmá gájui Redningsselskapet 27 olbmo heavvaneamis Norggas, ii oktage lean Romssas ja Finnmárkkus. Riikadásis leat gádjunfatnasat veahkehan 6 160 ja das ledje 835 ohcan- ja gadjunbarggu. Veahkehanlohku lea oktiibuot 10 412. Redningsselskapet váldočálli Grete Herlofson lohká gadjunsearvvi veahkkebargguid lohku muitala man dehálaš lea fásta ja eaktodáhtolaš bargit geat birra jagi leat gergosat olbmuid veahkehit.
