– Ollugiin lea faskkon ja gušta biillas, muhto lea maid buorre jus lea unna goivvoš dahje viđjjit mielde. Dalle lea álkit beassat luovos jus fáhkka borgagoahtá, čilge NAF senior diehtojuohkinráđđeaddi Nils Sødal.
Davvin lea áigá dálvan ja maŋemus beivviid lea borgan maid Lulli-Norggas.
Go olu muohta boahtá, de gártá jođánit heahtái go biila lea buot borgon ja galggalit beassat vuoddját. Jus muohtaboltunbiila lea vuodján das, de lea lassi muohta mii dagaha váttisin beassat luovos biillain.
Ii ávki rávvagiin jus ii ráhkkan
Olu muohta dahká ahte lea bahá darvánit biillain. Go oanehis áiggis muohttá olu, de eai olle muohtaboltunbargit nu jođánit buot sajiide.
– Unna goivvoš lea hui buorre biillas. Go lea gušten eret muohttaga, de goivestat eret doarvái muohttaga vai beasat vuoddját biillain, lohká Sødal.
Jus darvánat, de ii leat ávki rávvagiin jus eai leat veahkkeneavvut mielde biillas.
Veahkkegoansttat
Viđjjit dahje nu gohčoduvvon autosuohkku, lea buoremus, muhto sáhttá leat váttis bidjat juvllaide jus ii leat ovdal dahkan dan, čállá NAF.
– Buot álkimus čoavddus lea «viđji mii lea bovssas» man cirgguha deahkaide. Ollu gerddiid lea dat doarvái darvehus mainna beassá luovos, oaivvilda Nils Sødal.
– Muhto buoremus leat viđjjit dahje autosuohkku, lohká Sødal.
– Jus vállje oastit viđjjiid, de lea buorre hárjehallat geavahit dan. Dalle ii dárbbat nu bártidit bidjamiin go buollašis lea bártideame, lohká Nils Sædal NAF preassadieđáhusas.
