407 valáštallansearvvi Romssas ja Finnmárkkus ožžot máksojuvvot 27,9 miljovnna ruvnno.
Oktiibuot ožžot eaktodáhtolaččat Norggas máksojuvvot measta 2,5 miljárdda ruvnno lassiárvodivatbuhtadusa juovlamánus, rehketdoallojagi 2021 vuođul. Valáštallandoarjja lea olles 885,8 miljovnna ruvnno, mii lea 169,9 miljovnna eanet go diibmá. Valáštallanservviide máksojuvvo sullii 139,7 miljovnna eanet go diibmá ožžo, ja goalmmát jagi maŋŋálaga lea gálvo- ja bálvalusmávssut Norgga valáštallamii máksojuvvon ollásit.
Dán čállá Norgga valáštallansearvi preassadieđáhusas.
– Ráđđehus ollašuhttá iežas lohpádusaid ollislaš lassiárvodivatbuhtadusas valáštallama ja eaktodáhtolašdoaimmaid ovddas dan bokte go juolluda 430 miljovnna ruvnno eanet dán jagi salderejuvvon bušeahtas. Lea illudahtti go dáinna oaidná ahte leat lassánan doaimmat valáštallamis. Dát lei maid vurdojuvvon, go jahki 2021 lei vuosttažettiin jahki mas eai lean koronaráddjemat, dadjá valáštallanpresideanta Zaineb Al-Samarai ja lasiha:
– Ollu doaimmat leat maiddái bures duođaštuvvon čoavddalohkoraporttas, mii čájeha ahte sihke miellahttoovdáneapmi ja Norgga valáštallama doaibmalogut lassánedje buori muddui jagis 2022. Dattetge ferte ain bargat vai máhccat fas dan dássái mii lei ovdal pandemiija.
Diibmá hilgojuvvojedje 29 valáštallansearvvi go eai lean registrerejuvvon eaktodáhtolašvuođaregistarii. Dán jagi lea lohku 30. Oktiibuot ohce 5570 valáštallansearvvi momsakompensašuvnna, mii lea mearkkašahtti ollu eambbo go diibmá, go ledje 5446 valáštallansearvvi.
– Valáštallanservviid lohku mat dán jagi ožžot lassiárvodivatbuhtadusa lea hirbmat stuoris, ja eanet go njunušjagiin 2018:s, ovdal go pandemiija čuzii valáštallamii. Dát lea maid buorre indikáhtor dasa ahte doaibmadássi Norgga valáštallamis lea máhccan bissovaččat alla dássái. Dat lea hui movttiidahtti, dadjá Al-Samarai.
