Sámediggi fuomášii rutiidnadárkkisteamis geasset ahte čavčča sámediggeválggaid jienastuslohku ii leat ollislaš.
Dat mearkkaša ahte olbmot geat livčče galgat leat jienastuslogus, eai leat das álo. Lea sáhka 263 olbmos iešguđet válgabiirriin. Dasa lea sivvan go teknihkalašvuogádat masa Vearroetáhtas lea ovddasvástádus, ii leat doaibman nu go lei galgat. Sámediggi lea ovttas Vearroetáhtain bargan oažžut rievttes jienastuslogu sadjái, ja vurdojuvvo ahte dat lea divvojuvvon bearjadahkii, borgemánu 13. beaivái 2021.
Dievasčoahkkinjođiheaddji Tom Sottinen muitala ahte dát ii váikkut válga čađaheapmái man ge ládje.
— Lea váidalahtti go Vearroetáhta vuogádagat eai leat doaibman jienastuslogu oktavuođas. Liikká lea nu ahte ii ovttage jienasteaddji sáhte gieldit jienasteamis, vaikko vel eai leat ge jienastuslogus. Buohkat galget sáhttit jienastit buot válggain, ja dat guoská sámediggeválggaide maiddái, dadjá čoahkkinjođiheaddji Sottinen preassadieđáhusastis.
205000 olbmo registrerejuvvon jienastuslohkui
Son muitala maiddái ahte dássážii leat sullii 205000 olbmo registrerejuvvon jienastuslohkui. Sámediggi sádde ođasmahtton jienastuslogu daidda suohkaniidda main leat olbmot geat leat jávkan jienastuslogus ja dasto lea jienastuslohku ođasmahtton válgga loahpparehkenastimii.
— Ii oktage jietna hilgojuvvo, vaikko jienasteaddjit eai leat jienastusloguin mat suohkaniin leat dál. Válgga loahpparehkenastin šaddá nu go dábálaččat, eat ge mii vuordde maŋŋonemiid válgabohtosiid dáfus, dadjá Sottinen.
