Ovccis lohkásis oaivvildit ahte mánáin berre eanet fysalaš doaimmat skuvllas.
Váhnemat leat fuolastuvvan go mánát eai lihkat doarvái ja danin sávaše ahte skuvllas livččii eanet fysalaš doaimmat, čájeha ođđa guorahallan.
Opinion lea čađahan guorahallama Nasjonalforeningen for folkehelsen ovddas mas leat váhnemiin jearahan mánáid aktivitehta ja šearbmageavaheami birra.
– Dearvvašvuođaorganisašuvdnan leat seamma fuolas go váhnemat. Norgga mánát lihkadit menddo unnán. Go mánát leat birrasii 6 jagi boarrásat, de njiedjá aktivitehtadássi, ja stuorebuš mánát čohkkájit jaska masá olles beaivvi, lohká Nasjonalforeningen for folkehelsen váldočálli Mina Gerhardsen.
Menddo olu šearbmageavaheapmi
Viidáset čájeha guorahallan ahte masá 70 proseantta váhnemiin leat fuolastuvvan go mánát geavahit menddo olu šearpma.
– Šearbmageavaheapmi váikkuha dearvvašvuhtii ja motorihkkii, lohká Gerhardsen.
Opiniona guorahallamis leat jearahallan 500 váhnema miehtá riikka.
(©NTB)
