Dálvi lea dál beallemuttus, beaivvit maid čuvggodit. Ođđajagilohpádusat soitet vajálduhtton, muhto Opplysningskontoret for frukt og grønt diehtá ráđi.
Dálvi lea dál beallemuttus, beaivvit maid čuvggodit. Ođđajagilohpádusat soitet vajálduhtton, muhto Opplysningskontoret for frukt og grønt diehtá ráđi.
Opplysningskontoret for frukt og grønt diehtojuohkinorganisašuvdna dieđiha ahte 70 proseantta álbmogis háliidit rievdadit borrandábiid, muhto álget beare garrasit ja fáhkka.
– Berre baicce veahážiid mielde rievdadit, lohká Cathrine Øverås Frisvold. Son oaivvilda ahte dearvvašlaš biepmu ii ádján guhkit ráhkadit.
Veaháš lasihit
Preassadieđáhusas diehtojuohkinorganisašuvdna čállá ahte juohke borramis berrešii juogalágan ivdnás liigebiebmu. Sii rávvejit láibevajahasa ala bidjat ruotnasa, dahje iđitseaguhussii seaguhit murjjiid, šattuid dahje ruotnasiid.
– Vilgesvuostá šaddá njálgábun go ruotnasat leat alde, buvrui lea eappel hui buorre, ja iđitseaguhussii heivejit muorjjit, čállet preassadieđáhusas.
Iđitbiebmun árvalit maid smoothie.
Hástalus
Rávvejit álgit álkimusain, namalassii gaskabeivviiguin. Jus veahá heiveha, de lea sadji olu ruotnasiidda tallearkka ala.
Go eanet ruotnasat leat, de oažžu eambbo biebmotfibera, dehálaš vitamiinnaid ja minerálaid ja oažžu buori gallánandovddu.
Dábálaš biebmu bearrašiin leat spiinnemárffit.
– Jus dan veaháš unnida, de ii bora liikká olu sáltti ja buoiddi. Seammás borrá eambbo ruotnasiid, lohká Frisvold.
