Goalmmát oassi borramušas mii buvttaduvvo bálkestuvvá. Romssa fylkkasuohkan háliida unnidit borramušbázahusaid 20 proseanttain moatti jagis.
Goalmmát oassi borramušas mii buvttaduvvo bálkestuvvá. Romssa fylkkasuohkan háliida unnidit borramušbázahusaid 20 proseanttain moatti jagis.
Romssa fylkkasuohkan searvá «Unnit borramušbázahusaid 2020» prošektii.
Dat mielddisbuktá ahte fylkkasuohkana kantiinnain galget unnidit borramušbázahusaid 20 proseanttain ovdal 2020.
– Máilmmis bálkestuvvo goalmmádasoassi borramušas mii buvttaduvvo, ja dat ii leat fávdnái. Mii fertet mielde váikkuhit nu ahte unnidit borramušbázahusaid ja danin searvat dán prošektii, dadjá Fylkkaviesu kantiinna gievkanhoavda Oddny Kristin Karlsen.
Vihkkejit bázahusaid
Romssa fylkkasuohkan lea vuosttaš fylkkagielda mii searvá prošektii.
Fylkkaviesu kantiinnas galget vihkket buot borramušbázahusaid mat bálkestuvvojit.
Jurdda lea ahte borramušat galget sirrejuvvot guovtti láhkái.
Ovtta doapparlihttái bálkestuvvojit borramušbázahusat mat leat borahahtti, ovdamearkka dihte láibegarat, saláhttabázahusat ja šaddo- ja ruonasbázahusat.
Nubbái ges bálkestuvvojit bázahusat maid ii sáhte borrat, dego káfe- ja deadjabázahusat ja ruotnasiid garat.
– Eat mii geatnegahte olbmuid sirret borramušbázahusaid guovtti láhkái, muhto mii sávvat ahte olbmot servet dasa. Dáinna lágiin lassána diđolašvuohta borramušbálkuma ektui, lohká Karlsen.
Romssa fylkkasuohkan jođiha maiddái joatkkaskuvllaid kantiinnaid, maiddái dát servet prošektii.
