-Almmuhus-
-Almmuhus-
OĐĐASAT Niko ja Iŋgá-Máret leaba ođđa riikka­oasse­juoigit

Niko ja Iŋgá-Máret leaba ođđa riikka­oasse­juoigit

-

-

Mánnodaga almmuhii Romssa fylkkasuohkana geat leaba ođđa riikkaoassečuojaheaddjit.

– Romssa fylkkasuohkan lea čeavlái go dál almmuhat min guokte ođđa riikkaoassečuojaheddjiid, Niko-Mihkal Valkeapää ja Ingá-Máret Gaup Juuso, čállá Tromssa fylkkasuohkan preassadieđáhusas. 

Niko-Mihkal Valkeapää illuda ođđa ámmáhiin.

– Vuosttažettiin lea gudni go válljejuvvon dákkár virgái. Mus lea buorre dovdu go válljejuvvojin, ja beasan dáinna lágiin čalmmustahttit luođi, dadjá Valkeapää. 

Duhtavaččat

Tromssa fylkkasuohkana bealis leat maid duhtavaččat go leat ožžon guokte juoigi bargovehkii.

– Mii leat nu mearehis čeavlát go sihke Niko ja Ingá-Máret leaba dál min bargoveagas ja mii dáhkidit ahte geahččit ja guldaleaddjit besset illudit boahtte áigái, dadjá fylkkaráđi kultuvra ja ealáhus Sigrid Ina Simonsen (Bb) preassadieđáhusas.

Riikkaoassejuoigit mátkkoštit birra riikkaoasis, ja čuojahit unnit ja stuorit lávddiin. Preassadieđáhusas deattuhit ahte juoigit addet stuorra vásáhusat unna báikkážiin.  – Juoigan leamašan moadde jagi lunddolaš oassi min gaskkusteamis ja go dál virgádit guokte juoigi de mii loktet dán áŋgiruššama ovddasguvlui.

Duppalasten virggi

Preassadieđáhusas dieđihit ahte álggos lei beallevirgi, muhto dán jagi sii leat duppalasten. Dat mearkkaša ahte riikkaoassečuojaheaddji guovttos leaba goappašagat virgáduvvon 50% virgái. – Guokte ođđa riikkaoassemusihkkára virgádeapmi addá midjiide vejolašvuođaid olahit viidábut min gaskkusteamis sámi musihkas ja kultuvrras, sihke dáiddalaččat ja buvttademiid ektui, muitala Simonsen.

Loktet árvvu

Valkeapää mielas lea buorre virgádit fylkkajuoigi, ja rámida earenoamážit go guokte leat virgáduvvon.

– Dat lokte luođi árvvu ja čalmmustahtte luođi iešguđet arenain, nu go ovdamearkka dihte mánáidgárddiin. Hui illudahtti go čájehit virggiin atnet árvvus árbevieru, dadjá Valkeapää. 

Illuda ovttasbargat

– Mun vuorddán iluin bargat eará musihkkáriiguin, ja áinnas Inga Márehiin gii lea hui čeahpes juoigi. Šaddá hui suohtas beassat bargat iešguđet guovllu musihkkáriiguin. Doppe leat maiddái hui ollu čeahpes olbmot geaiguin in leat ovdal ovttasbargan, muitala Valkeapää.

Nordlysfestivála ja Iliosfestivála dáhkidit

Buvttadeami lea vejolaš vásihit Nordlysfestiválas dahje Ilios-festiválas ođđajagimánus. 

– Mii sáhttit dál juo dáhkidit ahte vuosttaš vejolašvuohta vásihit dán guokte rámálmas musihkkára ovttas lávddis, lea min buvttadeamis –Duvvene! Dat lea okta lávllabirrajohtu mas leat 10 lávlaga davvi-, julev-, ja máttasámegillii maid čálli Rawdna Carita Eira lea čállán ja riikkaoassemusihkkár Håvard Lund lea komponeren, čállá fylkkasuohkan preassadieđáhusas.

-Almmuhus-