UiT ákkastallá sii nammadit Brundtlanda su guhkes áiggi politihkalaš ja dieđalaš barggu ovddas, man dovdomearka lea máhtolašvuođa lahkoneapmi stuorát servodatgažaldagaide sihke sisriikkalaččat ja riikkaidgaskasaččat.
Brundtland lei Norgga vuosttaš nissonstáhtministtar. Son leamaš maid birasgáhttenministtar ja leamaš Bargiidbellodaga jođiheaddji ja nubbijođiheaddji. Son leamaš maid Birrasa ja ovdánahttima mailmmilávdegotti jođiheaddji (1983-1987) mii čalmmustahtii ceavzilvuođa ovdáneami. Son lei maid Máilmmi dearvvašvuođa organisašuvnna (WHO) jođiheaddji áigodagas 1998–2003.
– Gro Harlem Brundtland lea leamaš ja lea ain dehálaš movttiidahtti máilmmiservvodaga suorggis biras ja dearvvašvuohta. Son lea čielgasit áŋgiruššan olmmošvuoigatvuođaid riikkaidgaskasaš ovttasbarggus, lohká UiT – Norgga árktalaš universitehta rektor Anne Husebekk preassadieđáhusas.
Gudnedoavtterlágideapmi lea Oslos, miessemánu 26. beaivvi tiibmu 12.00. Rap-artista Musti guoimmuha iežas lávlagiin man lea ráhkadan iežas politihkalaš ovdagovvii, Brundtlandii.
Gudnedoaktárat geat soitet leat oahppásat Ávvira lohkiide: Mari Boine (2018), Laila Stien (2015), Ole Henrik Magga (2008), Rodolfo Stavenhagen (2006), Dalai Lama (2001), Rigoberta Menchú Tum (1996), Carsten Smith (1995).
