Norggas leat uhcit guovžžat, ja maiddái Finnmárkkus leat registrerejuvvon uhcit guovžžat. Norggas ledje diibmá 136 guovžža, davimus fylkkas ellet 34 guovžža.
Norggas álge 2009:s čohkket guovžaguolggaid ja baikkaid, dáinna lágiin leat registreren man olu guovžžat dáppe ellet. Rovdata lea almmuhan diimmá loguid, oktiibuot leat 12 uhcit guovžža Norggas dál go ovddit jagi.
– Norggas registreriimet 136 guovžža diibmá, ná unnán eat leat registreren dan rájes go álggaheimmet doaimma, lohká Rovdata jođiheaddji Morten Kjørstad preassadieđáhusas.
Finnmárkkus uhcit
Norgga davimus fylkkas ellet nubbin eanemus guovžžat olles Norggas, muhto maiddái Finnmárkkus njiedjá guovžalohku. Finnmárkkus galget dušše 34 guovžža, muhto jáhkkimis lea lohku ná vuollin go fylkkas leat uhcit DNA-geahččalemiid čohkken go ovdal. Jagi ovdal registrerejedje 107 eambbo iskosa go diibmá.
Njiŋŋelasat guovžžat lassánit
Diibmá registrerejedje 82 varrisguovžža ja 54 njiŋŋelasguovžža, ovddit jagi ledje 93 varrása ja 55 njiŋŋelasa. Dat mearkkaša ahte njiŋŋelasguovžžat lasket Norggas.
– 40 proseantta nállis leat njiŋŋelasguovžžat, ja nu go ovdal maid, de ellet njiŋŋelasat dušše rádjaguovlluin Finnmárkkus, Romssas, Nordlánddas, Davvi-Trøndelagas ja Hedemárkkus, lohká Kjørstad.
Uhcit go galget
Stuorradiggi lea mearridan ahte Norggas ožžot jahkásaččat šaddat 13 beassádaga, muhto registrerema vuođul leat gávnnahan ahte diibmá šadde dušše guhtta guovžabeassádaga.
– Logut čájehit ahte 2009 rájes leat dušše šaddat guhtta-čieža beassádaga jahkásaččat, čilge Kjørstad.
Oktiibuot čohkkejuvvojedje 962 DNA-analysa diibmá, dát lea unnit go eará jagiid go leat čohkken gaskal 1208-1417 analysa.
