Go Romssa valáštallanjoavkku váldospábbačiekčanjoavku čiekčá guossečiekčamiid boahtte jagi, de lea sámegiella ožžon guovddáš saji joavkku ođđa báiddiin.
Mannan gaskavahkku almmuhuvvojedje TIL ođđa báiddit mat galget geavahuvvot čiekčamiin boahtte jagi.
Báiddit maid TIL geavaha guossečiekčamiin fuomášuhttet sámegiela. Váldoruhtadeaddji logo oainnat deaddiluvvo sámegillii.
– Mun lean hirbmat ilus go Seastinbáŋku 1 Davvi-Norga háliida ovddidit sámi giela ja kultuvrra. Go guokte nana aktevrra ovttasbarget, de jáhkán dás positiiva váikkuhusaid, lohká TIL beaivválaš jođiheaddji Øyvind Alapnes.
TIL lea dán jagi bargan aktiivvalaččat vai sámegiella, sámi kultuvra ja identitehta čalmmustahttojit. Sii leat RomsaDál-prošeavtta bokte earret eará čađahan diehtojuohkinbarggu, lágidan skuvlačiekčamiid ja ráhkadahttán sámi kapteaidnabátti.
Dehálaš
SeastinBáŋku 1 Davvi-Norga deaddilii TIL-báiddiid sámegillii Giellavahkku oktavuođas, ja sis lea ge dáhttu dan fievrridit viidáset maiddái boahtte jagi.
– Spábbačiekčan lea identitehta ja spábbačiekčan boktá dovdduid. Nu lea maiddái gielain. Okta dehálaš oassi min bissovašvuođastrategiijas lea gáhttet álgoálbmotgiela. Dan dihte šaddá min sámegielat logo oaidninláhkai TIL-báiddiin boahtte jagi maiddái, nu go dán čavčča sámi giellavahkkus. TIL áigu čiekčat buot guossečiekčamiid min sámi logoin 2023:s. Dáinna leat rámis, čállá SeastinBáŋku iežaset Facebook siiddus.
