-Almmuhus-
-Almmuhus-
OĐĐASATT-báiddiin áigot čalmmustahttit ášši

T-báiddiin áigot čalmmustahttit ášši

-

-

Ovttasbarget boktit fuomášumi áššái mainna leat 50 jagi bargan.

Nordting ja RiddoDuottarMuseat leat ovttasbargan ođđa áŋggirdeami. Sii čalmmustahttet ahte lea dárbu sierra sámi dáiddamuseai. RiddoDuottarMuseaid direktevra Anne May Olli čilge ahte dál heivii hui bures, go lea 50 jagi áigi go vuosttaš geardde lihkai jurdda sierra sámi dáiddamusea ásahit.

– Lea maiddái viđa jagi áigi go mii rievdadeimmet olles Davvi-Norgga dáiddamusea sámi musean. Doppe ledje iešguđet čájáhusat, main dušše sámi dáidda lei. Dat oaččui ollu fuomášumi ja bálkkašumiid. Leimmet ge sávvan čalmmustahttit sámi dáiddamusea sávaldaga, muitala Olli.

Dán rájes ožžo ollu lohpádusaid ja sániid, muhto Olli ii loga barggu ovdánan dan guvlui ahte leat álggahan barggu ásahit musea. Dasa lea su mielas dál áigi.

– Danne áigguimet fuobmát juoidá mainna buktit beroštumi, namalassii t-báiddiid vuovdit, čájehan dihte ahte dáppe leat olbmot geat vurdet sámi dáiddamusea. Sápmi vuordá, ja máilbmi vuordá, dadjá Olli.

– Iežamet narratiiva

Son oaidná stuora dárbbu čohkket sámi dáidaga.

– Muhtumat dieđusge lohket ahte mii aŋkke beassat čájehit sámi dáidaga, muhto lea eanet go dušše čájehit ja sáddet dáidaga eará museaide. Doppe leat iežaset kuráhtorat, geat ásahit čájáhusaid. Sii bidjet konteavstta, sii mearridit narratiivva. Sámi dáiddamusea livččii min iežamet jietna, min iežamet muitaleapmi ja min narratiiva, čilge Olli.

Oahppu ja bargosajit

Son maid deattuha dehálašvuođa ásahit sámi ásahusa, mii buvttášii bargosajiid sámiide ja addá sámi nuoraide válljenmuni oahpu ja surggiid ektui.

– Seammás leat sámi ásahusat hui dávjá eará eamiálbmogiidda maid, ja buktet vejolašvuođaid čatnat oktavuođat riikkaidgaskasaččat. Mii oaidnit ollu vejolašvuođaid. Váikkuhivččii oahpahusa beali maid, go mii sáhttit hukset sámevuođa ja oažžut nuoraid válljet maid áigeguovdilis oahpuid maid sáhttet geavahit álggahit karrieara kuráhtorin, ovdamearkka dihte. Dál váilot kuráhtorat, geat sáhttet muitalit sámi narratiivvas.

-Almmuhus-